All England-ah Sindhu tla hma

All England-ah Sindhu tla hma
Birmingham khuaa badminton tourna-ment lian khelh mek All England Cham-pionships women’s singles lamah Nilaini khan tunlaia chechhe tluang mek PV Sindhu chuan first round a paltlang zo lo leh tawh a, world number 17 Zhang Yi Man of China chuan world no 9 Sindhu hi straight games hmangin a hnawtchhuak.
Star Indian shuttler Sindhu hi minute 39 lek chhungin Chinese lakah 17-21, 11-21-in a tlawm a, double Olympic medallist tan tun hi tournament first round a paltlang zawh loh vawithumna chiah a ni.
Tunhma lamin Sindhu leh Zhang-i hi vawihnih intum tawhin, tum khat ve ve an chak a, an record enin ranking lamah inthlau mah se chak tur sawilawk thiam harsa tak a ni reng a, Nilainiah Indian a tlawm.
Kumin January thla khan Malaysia Open-ah Spain player tha Carolina Marin hneh lo tawhin, hemi thla vek Indian Open-ah hma takin a tla bawk.
Tunhnai khan a coach chhawr lai Korean Park Tae-sang a ban a, Tokyo Olympics-a bronze medal lakpuitu nena an inthen hnuah coach thar a la ruai leh ta lo a, a chetchhiat pawh duhthusamin a la kal tluang!
Men’s singles lamah top Indian dang Kidambi Srikkanth chak ve thungin, Frenchman Toma Junior Popov lakah game khatna hloh zet mah se 19-21, 21-14, 21-5 hnehna nen darkar khat leh minute thum chhungin first round match a paltlang.
Srikkanth hian pre-quarterfinal lamah seventh seed Kodai Naraoka of Japan hmachhawnin, a dinhmun tarlan hman a ni rih lo.
Nilaini vek khan India women’s doubles pair Treesa Jolly leh Gayatri Gopichand Pullela chuan seventh seeded Thailand pair Jongkolphan Kititharakul leh Rawinda Prajongjai chu minute 46 chhungin first round match pakhatah 21-18, 21-14-in an hneh nawlh a, pre-quarter-final lama Japanese pair Yuki Fukushima leh Sayaka Hirota an hmachhawn boruak pawh tarlan hman a ni rih lo.
Men’s doubles first round match lamah ve thung 6th seeded India pair Satwiksairaj Rankireddy leh Chirag Shetty tangdun chuan an chipui Krishna Prasad Garaga leh Vishnuvardhan Goud Panjala inkawp lakah 21-13, 21-13 hnehna an chang a, Satwik leh Chirag thawkdun hian pre-quarterfinal match-ah Chinese pair Liang Wei Keng leh Wang Chang an tum zui leh.