CM-in DA 4% a tihpun a remti Sawrkar hnathawk nawrh tum thulh

Sawrkar hnathawkten dearnesss allowance zaa 4-a tihpun an ngiat chu chief minister-in a remtih sak a, an hlawh thlatir lak theih ziah turin sawrkarin theihtawp chhuah a tum tawh bawk. Heng avangte hian sawrkar hnathawk inzawmkhawm pawlin lungawilohna lantir an tum chu an thulh rih tih an sawi.
Mizoram sawrkar hnathawk inzawmkhawm pawl, Federation of Mizoram Government Employees & Workers (FMGE&W) chuan an thil phut hrang hrangte ngiatna atan vawiin – March 6 atanga tanin ‘peaceful demonstration’ neih an tum thu an lo sawi tawh a. An thil phutte ngaihtuah hian March 4 khan chief minister Zoramthanga hoin deputy chief minister Tawnluia leh Finance principal secretary te bakah FMGE&W hruaitute an thukhawm a, hetiang hian sawrkar chuan an thil phut chungchangah rawtna a siam.
Dearness allowance (DA) hman lai mek atangin zaa 3-a tipungin zaa 31 pung a ni anga, 2023 April 1 atanga hman tan a ni anga, kumin July ah sawiho leh a ni ang.
Sawrkar hnathawkte hlawh chu thla tira pek a nih zel theihna’n sawrkarin tan a la zel ang.
Sawrkar hnathawk pension hun, kum 62-a pawhsei an ngiat chu chief minister-in a thuphungin cabinet minister-te a sawipui tawh a. Chief minister hian remchang hmasa berah DP&AR bultumin FMGE&W, Finance department, zirlai pawl leh NGO hrang hrangte nen inrawnkhawm a siam ang, tih te a ni.
Heng avangte hian March 6 atanga nawrh an tum chu thulh turin sawrkar hotute hian an ngen.
Inrinni tlai khan sawrkar rawtna leh ngenna ngaihtuahin FMGE&W hian thutkhawm hmanhmawh a ko ve nghal a. Hlawh a hun taka pe thei turin sawrkarin tan lak a tum chu lawmawm an ti a. Pension kum, kum 62-a tihsan chungchanga chief minister-in inrawnkhawm a rawt chu tha tiin an pawm bawk.
DA hman mek zaa 3 pung erawh central hman lai mek a phak lohna a tam avangin an pawm thei lo tih an sawi thung.
Inrinni zan la la hian FMGE&W hruaitute chuan chief minister an hmu leh a, DA rate zaa 4-a tihpun loh chu pawm harsa an tih thu an thlen a ni.
FMGE&W lam sawi danin, chief minister hian DA 3%-a tihpun pawh chu sum harsa tak kara ti an ni tih a lo hrilh a. Finance department hotute phei chuan harsa an ti chung chunga pek a nih thu a lo hrilh nawn. Hemi hnu hian Finance hotute leh a cabinet hotute pawh rawn loin DA pung 1% (a hma ami nen a vaiin 4%) chu chief minister hian pek a remtih sak leh ta a ni.
Hemi ang hian DA hi zaa 4-a pungin, zaa 32 pung an la tawh dawn a ni.
FMGE&W thuchhuah danin, sawrkarin sum harsa tak chunga hlawh a hun taka pe tura theihtawp chhuaha tan lak a tum chu lawmawm an ti a. DA zaa 4 pung pawh an duhthusam ni lo mah se, sawrkarin theihtawp a chhuah takzet nia ngaiin, July 23-a hemi chungchang sawiho leh huna beiseina sang tak nei chungin, March 6 & 7 leh 9 & 10 chhunga peaceful demonstration neih an tum chu thulh lailawk a ni tih a sawi.
Pension kum 62 chungchangah pawh hmasawnna tha zawk a awm zel an beisei tih a sawi bawk.