World Cup 2026 khel tur England

October 14, Thawh
leh zan khan Europe khawmual atang a World Cup 2026 khel tur zawnna khelh chhunzawm a ni a, 5-0 ngwta Latvia sawptu England chu World Cup 2026 khel turin an tling. England an tlin lai hian Portugal erawh Hungary in an chelh a, WC 2026 khel turin a la tling rih lo thung. England an chak rual hian team lian Spain leh Italy te pawhin hnehna an chang ve bawk.
England an tling
Group K hmahruaitu England hi Latvia hmachhawn turin Daugavas Stadions-ah an leng lut. An len luhna mualah an chak a nih chuan World Cup khel turin an tling chiang tawh dawn a, an hun tha hlah an tum lo hle. Mikhual an nihna mualah an khel tha a, 5-0 ngawta hnehna changin an tum ram an thleng a, Europe atanga tling chiang hmasa ber an ni ta hial a ni.
England hian goal thun ngei tumin mualneitu an nawr nghal char char a, Anthony Gordon chuan minute 26-naah hmahruaina goal a thun ta nge nge. Team lian lakah goal an chhuah vangin Latvia an buai leh zual a, an mikhualte nawr let turin theihna an nei tam lo hle. An si phurh sut an mamawh viau laiin chawlhlawk hmain goal hnih an chhuah belh leh ta zawk.
England tan hian Harry Kane chuan minute 44-naah goal thunin an hmahruaina a tizau. An goal hnihna an thun atanga minute khat pawh tling loah Three Lions hian penalty an hmu zui leh zat bawk. Penalty hi Kane chuan pet goal zui leh nghalin an hmahruaina a tizau leh zual a, si thum fai ngawta hmahruai chungin chawlhlawk an hmang.
Chawlhlawk hnu lamah England an khel tha chhunzawm a, goal pawh an thawkchhuak leh thuai. England in an nawrnat em vangin minute 58-na lekah Latvia player Maksims Tonisevs chuan an lamah a ti-goal palh a, England goal lina a thunsak. Hemi hnu hian goal lut a awm belh thei lo vang vang. Goal lut a awm belh theih loh reng hnuin Eberechi Eze chuan minute 86-naah England goal ngana thunin a tawp a khar a, 5-0 in an chak zui ta a ni.
World Cup khel tur zawnnaah England hi an khel tha viau a, vawi ruk khel tawhin an la chak vek a, group K-ah point 18 an hmu a, an hnuai chiaha awm Albania in point 11 an hmu ve mek a. Albania tan England hi umphak theih an ni tawh lo.
Portugal an tling teuh
Thawhleh zana inkhel dangah Group F hmahruaitu Portugal in Estádio José Alvalade-ah Hungary an mikhual. An mualah chak se Portugal hi World Cup khel turin an tling chiang thei dawn a, chak pawh an chak teuh hle. Cristiano Ronaldo goal hnih thun hmangin hma an hruai reng a, hun pek belhah goal chhuahin an chak zo lo hlauh thung.
Portugal hian an mualah bul an tan tha lova, goal an chhuah hma hle. Inkhel tan atanga minute 8-na lekah Attila Szalai chuan Hungary hmahruaina goal a thun nghal. Hma takah goal an tun vangin Hungary hi phur viau mah se an phur rei lo thung. Portugal in an si phurh sut ngei tumin an mikhualte an nawr let a, Cristiano Ronaldo chuan minute 22-naah goal thuin an si phurh a sut. Football piang tawh zawng zawng zingah ram tana goal thun hnem ber C Ronaldo hian minute 45+3-ah hma an hruai letna goal a thun zui leh a, 2-1 a hmahruai chungin chawlhlawk an hmang.
Portugal tana goal hnih thun Ronaldo hian World Cup khel tur zawnna bikah goal 41 a thun tling ta chiah a, World Cup khel tur zawnnaah goal thun hnem ber niin Guatemala striker Carlos Ruiz goal thun 39 a khum a, record thar a siam belh.
Chawlhlawk hnu lamah inkhel a hmuhnawm zui viau a, goal lut a awm belh har hle. Hun pangngai tawp thleng an la chak vangin Portugal in World Cup an hnaih hman hle. Tling tura an inngaih tawh hnu minute 90+1 ah Hungary tan Dominik Szoboszlai chuan goal thunin an si phurh a sut. He goal vang hian Portugal lakah tlawm an pumpelh a, World Cup khel tura tling mai tur Portugal an chelh khawtlai ta chiah bawk.
Group F-ah hian khelh li atanga point 10 hmuin an hnuai chiaha awm Hungary lakah Portugal in point 5 ngawtin hma an la hruaifal a, WC 2026 khel tura tlin an hlat tawh lo viau.
Spain leh Italy an chak
Thawhleh zana inkhel dangah team lian Spain leh Italy ten hnehna an chang ve bawk.
European champion Spain in an mikhual Bulgaria chu 4-0 ngawtin an sawp. Spain tan hian Mikel Merino chuan goal hnih a thun a, Oyarzabal chuan goal khat a thun bawk. Spain rual hian Italy pawhin an mikhual Israel chu 3-0 in an lo sawp ve bawk.