By Lalthlamuana Pachuau
-- Advertisement --
Thuhma:
All India Service (AIS) officer-te hi central sorkar leh state sorkar a dinhmun pawimawh tak tak chelhtute an nih avangin AIS-a luh dan, an dinhmun leh kaisan chhoh dan te hi hriat ve a thain a pawimawh a. AIS hian Indian Administrative Service (IAS), Indian Police Service (IPS) & Indian Forest Service (IFS) te hi a huam a. AIS a ‘direct’ a lut te leh State Service atanga AIS a kai te dinhmun leh an kaisan chhoh zel dan, Rules leh Regulation hrang hrang atanga lawrkhawm kan tarlang dawn a ni.
1. AIS a luh/kai dan: AIS officer-te hi State/Cadre hrang hranga post ruak awm dan azirin chung State/Cadre pual chuan central sorkarin a la (recruit) thin a. Graduate chin UPSC hnuaia ‘exam’ pe a inziak tlingte chu AIS-ah hian ‘direct’ in a luh theih a. An awmna tur State Cadre hi post ruak awm dan leh exam-naa an tih that dan azirin pek an ni thin. Tin, state sorkar hnuaia State Service Officer te pawh an thawhna State Cadre-a AIS post ruak awmah an kaisang (promotion) thei bawk a ni.
2. Tute nge All India Service (AIS) ah kai thei: Mizoram atang bik chuan State Service pathum – Mizoram Civil Service (MCS), Mizoram Police Service (MPS) & Mizoram Forest Service (MFS) officer-te hi “IAS/IPS/IFS (Appointment by Promotion) Regulation” hnuaiah IAS/IPS/IFS ah te an kai thei a, IAS bikah hian MCS ni kher lo Non-State Civil Service (NSCS) te pawh an puala ‘quota’ (15% of promotion quota) awmah “IAS (Appointment by Selection) Regulation” hnuaiah an kai thei bawk a, NSCS officer, IAS a kai thei leh lut duhte chu state sorkarin ‘Advertisement’ chhuaha thlang hmasain central sorkarah rawtna a thlen thin. AIS a kai tur hian State Service-ah kum 8 aia tlem lo service nei tawh nih a ngai a, AIS a kai turte hi UPSC Chairman kaihhruai, Selection Committee-in an thlang thin.
3. AIS a kaisangte seniority pek dan: State Service-a kum 12 service nei tawh chinte chu AIS an kaiin an service neih tawh kum 4 zel kha AIS-a kum 1 service anga chhiarsak an ni a, amaherawhchu State Service-a kum 8 chin, kum 12 aia tlem si service nei, AIS a kaite pawh AIS-a kum 3 service nei tawh anga chhiarsak (seniority/weightage pek) an ni thin. Kum 12 aia rei, kum 21 thleng (kum 9 dang) State Service a service lo nei tawhte chu kum 9 chhunga an kum 3 service zel kha AIS a kum 1 service anga chhiarsak an ni leh a; State Service a kum 21 aia rei service lo nei tawhte chu kum 21 baka an kum 2 service zel kha AIS-a kum 1 service anga chhiar a ni a, amaherawhchu kum 21 baka an service chu kum 6 aia tam pawh nise kum 3 bak ‘weightage’ pek belh theih a ni tawh lo.
Entirna: Kum 2000-a State Service-a lut kha kum 22-a service mek laiin kum 2022 ah Selection Committee-in AIS kai turin thlang ta se la, a seniority atan weightage kum 6 pek a ni ang; kum 2022 atangin kum 6 hi paihin a seniority (year of allotment) chu kum 2016 a ni ang: (TABLE)
4. AIS Officer te kaisan (promotion) chhoh dan leh an post chelh theihte: All India Service (IAS/IPS/IFS) a appointment hmute chu Junior Scale (Level 10) ah kum 4 chhung an awm phawt a. Chumi hnuah hun bithliah neiin ‘promotion’ an hmu thin a. AIS-a an luh tirh atanga an dinhmun (grade/level), an kaisan (promotion) dan leh Central leh State sorkar-a an post chelh thinte chu hetiang hi a ni. {Table (I) (II)(III)}
5. Transfer & Posting leh Deputation chungchang: AIS officer-te hi eng state/cadre emaw ber puala lak vek an ni a. Mizoram hi Arunachal Pradesh-Goa-Mizoram and Union Territory (AGMUT) cadre zinga state pakhat kan ni a. AGMUT cadre hnuaia AIS officer te hi chu Arunachal Pradesh, Goa, Mizoram leh Union Territories khawiah pawh (J&K leh Ladakh tiamin) ‘transfer/post’ theih vek an ni a. Tin, AIS officer te hi central sorkar hnuaia post ruak hrang hrang awmah ‘deputation’-a awm an dil a, phalsak an nih chuan tum khatah kum 4/5 vel chhung an awm thei a, chubakah an awmna state/cadre ni lo state/cadre dang engemaw berah ‘deputation’-a kal/awm an duh a, chung state pahnih sorkarte leh central sorkar /Cadre Controlling Authority te’n an remtih bawk chuan tum khatah kum 4/5 vel chhung an awm thei bawk a ni.