Alzheimer natna inhrilhzau

Thluak sawng natna, tia sawi theih Alzheimer natna chungchang inhrilhzauna hun atana hman ‘World Alzheimer’s Day’ chu September 23 khan hman a ni a, he ni pual hian Aizawlah pawh hun hman a ni.
Alzheimer and Related Disorders Society of India (ARDSI) Mizoram Chapter buatsaiha hun hman hmanpuitu Health & Family Welfare minister Lalrinpuii chuan, tunlai khawvelah mihring dam hun chhung rei tial tialin kum upa an pung zel a; natna chi hrang hrangin a tlakbuak theih zingah enkawl leh buaipui ngai em em pakhat chu Alzheimer hi a ni tih a sawi.
Alzheimer kan hriatchian lehzual a, a hun taka natna hmuh chhuah a, a veiten enkawlna tha zawk an dawn ngei a beisei tih a sawi a. He natna veitei enhrang mai loin, khawtlang leh mipuiin kan hriatthiam a pawimawh tih a sawi. NITI Aayog leh ARDSI chuan Alzheimer veite enkawl kawngah thawh dunin, Mizoram sawrkarin Article 275(1) hnuaiah Alzheimer’s Home a sa mek tih a sawi bawk.
ARDSI Mizoram Chapter chuan Alzheimer natna hi Mizoramah pawh natna hriat hlawh tak a ni tawh a. A tih damna awm lo mah se, a enkawl danah chhungkua, thenawm khawveng leh khawtlang hriatthiam, enkawl thiam leh intawiawm tawn a tul em avangin he pawl hi an din tih an sawi a. Phungbawm sawmin Alzheimer natna sawiho leh a natna vei enkawltute inzirna seminar leh workshop an hman thin bakah hmun hrang hrangah MUP, YMA leh kohhran nen Alzheimer natna veite chhinchhiahin an tlawhchhuak a, an thihin an ral thin. Social media hmangin Mizoram pumah he natna vei chhungkuate inhriattawn leh intawiawmna an buatsaih thin tih an sawi bawk.