Anant Ambani leh Radhika Merchant te inneihnaah hian an sawm zau ve khawp mai, reality TV star leh entrepreneur Kim Kardashian leh a laizawn Khloe Kardashian te pawh mo lawm turin Mumbai-ah an rawn thlawk lut ve leh ta rup mai. Kim Kardashian hian boruak a nei lian riau a, Mumbai airport-ah paparazzi rualin an lo veh nasa mai.
Kim leh Khloe te hi Indian takin an lo welcome a, Taj Mahal Hotel-ah an thleng a, pangpar thi an lo awrh tir bakah an chalah tikka te pawh an tih sak. Kim pawhin nuam a ti viau a ni ang, a Instagram-ah thlalak post-in a caption-ah “Hi” tiin India flag a dah tel bawk.
Nimina inkutsuih ta Anant Ambani leh Radhika Merchant te inneihnaa tel tur hian khawvel huap milar an sawm khawm nasa hle a, wrestling legend John Cena, boxing khawvela hming dai tawh lo tur Mike Tyson, martial arts star Jean-Claude Van Damme bakah Nigerian zaithiam, Selena Gomez nena hit zet a ‘Calm Down’ tih hla satu Rema te pawh mo lawm tura sawm zingah hian an tel. Nick Jonas leh Priyanka Chopra te pawh mo lawm turin Mumbai-ah an thlawk lut tawh bawk e.
Ambani mo nei tur hi April thla atang khan a lawmna hmasa an lo buatsaih tawh a, Rihanna chah chhuakin, chumi hnuah nuamtawlna lawng lianin tuipuiah mo lawmna an nei leh tluk tluk a, hetah hian Katy Perry pawh perform turin an an chah chhuak a, hmanni lawkah sangeet ceremony a perform turin Justin Bieber an chah chhuak leh tawh bawk.
Khawvel milar te bakah India milar te pawh an sawm kim hle a, pre-mo lawmna party-ah Salman Khan, Shah Rukh Khan, Ranbir Kapoor leh Bollywood star lar tak tak te paw an lo perform suau suau tawh bawk. April thla a mo lawmna hmasaah khan Bill Gates leh Mark Zuckerberg te pawh an rawn tel kha a ni a, tun tumah hian Samsung Electronics Chairman Lee Jae-Yong leh UK Prime Minister hlui Boris Johnson te pawh mo lawm turin an rawn tel dawn e.
Nimin, July ni 12 khan Shubh Vivah ceremony (sakhaw lam serh leh sang) neiin, an khualtha te pawh traditional Indian dress ngeia an inthuam vek a rinawm a, July ni 13-ah Shubh Ashirwad an ti leh ang a, Indian formal dress code a ni. Chuta mo lawmna pui ber, July ni 14-ah Mangal Utsav an nei leh ang a, hetah hian Adele, Drake leh Lana Del Rey te pawh an perform dawn niin report a awm. July ni 12 atanga ni 14 thleng event zawng zawng hi Bandra Kurla Complex-a vek neih a ni ang.
Ambani mo lawmna chhim turin Kim Kardashian Mumbai-ah
Get real time updates directly on you device, subscribe now.
Prev Post