Ambani mo lawmnaa Justin Bieber zai man a to

India a hausa ber Mukesh Ambani fapa, Anant Ambani leh Radhika Merchant te inneihna tluka hautak hi India-ah a la awm tawp ang, an inkutsuih hma ni a chhung khat leh thiantha te tana welcome party an neih thin, sangeet ceremony-a zai tura an sawm chhuah Justin Bieber chuan he ceremony-a a perform manah hian dollar maktaduai 10 (cheng vaibelchhe 83 vel) a phut chhuak thei niin Financial Times chuan a tarlang. He sangeet ceremony hi July ni 5 zan khan Nita Mukesh Ambani Cultural Centre (NMACC), Mumbai-ah neih a ni a, a event hmingah hian ‘Celebration of Hearts’ tih an hmang.
Bieber hi Anant Ambani leh Radhika te pre-wedding party-a zai tura an sawm chhuah Rihanna aiin a inchhiar to zawk a, Rihanna khan dollar maktaduai 8-9 (cheng vaibelchhe 66-74 vel) a inchhiar niin report a awm a, Bieber hian Rihanna rate aia sang a phut chhuak thei tlat a ni.
Bieber hian private performance-ah dan narain dollar maktaduai 2.5-6 (ceng vaibelchhe 20-50) vel a inchhiar tlangpui niin report a awm a, tun tum chu khawvel mihausa zual top 10 zingah pawh lang pha te mo neihna tur a ni bawk a a rate pangngai aiin a inchhiar to ve deuh te pawh a ni mahna!
Anant leh Radhika te sangeet ceremony-ah ian tunlai Bollywood star kei ka ni inti chin chu a kim a ni deuh ber a, Ranveer Singh, Salman Khan, Ranbir Kapoor leh Alia Bhatt te pawh an perform zak zak a, Janhvi Kapoor, Siddarth Malhotra, Kiara Advani te pawh an inlan a, cricketer lar Rohit Sharma leh Varun Dhawan te pawh an inlan.
Anant leh Radhika te hi July ni 12-ah an inkutsuih tawh dawn a, July ni 13 leh ni 14-ah mo lawmna an nei zui leh dawn a, mo lawmna hnuhnung hi Jio World Convention Centre,t Bandra Kurla Complex (BKC), Mumbai-ah neih a ni dawn a, hetah hian tunlai zaithiam lar hriathlawh berte zinga mi Drake, Adele leh Lana Del Rey te an perform dawn niin report a awm bawk. He mo lawmna hmasa lamah Katy Perry leh Backstreet Boys te pawh Ambani chhungkua hian an lo chah chhuak tawh bawk a ni.