AMC-a thawktu indaihlohna hi…

AMC-a eptu pawl tena rorel lai MNF an puhmawhnate sawifiahna chu nimin khan MNF lamin an auchhuahpui a. Eptu lamina an puhnate chu thu belhchiandawllo tiin puh an nihna hrang hrangte an sawifiah a.
Eptu lamin an puhna pakhat, in sak dilna leh lei laih dilna tihfel hun chhung rei thin anga sawi chu, ruling lam chuan sawifiahin, an sawifiahna point hrang hrang zinga pakhat chu ‘thawktu indaih lo’ tih a ni.
Mihring nuai li dawn awmna Aizawl khawpuiah hian in sak dilna te, lei laih dilnate hi khawpui enkawltu sawrkar AMC hnenah hian a lut ve malh malh dawn tih a hriat reng mai. Thildang dilna anga awlsam taka ngaihtuah nghal mai theih loh thil a ni a. A hmunah endik a, a leilung awm dan te leilung lam mithiamte nena enho a, zir chian a, chumi hnua thenawmte nena a inkungkaih dante enho leh a, a tawpa thutlukna siam chauh ngai tur chi a ni. Tihsual palh chuan, lei min hum hum theihna, chumiin a nghawng chu kan hriat vek ang hi a ni mai awm e.
Thawktu indaihloh dan an sawi hmangah chuan, AMC-ah hian officer 9 an awm a, gazetted sanction post 24 a ruak niin an sawi a ni.
Heta tanga lo lang chiang ta chu, gazetted sanction post zawng zawng hi hnawhkhah kim thlap pawh ni se, a nihna takah chuan Aizawl khawpui enkawl tur chuan thawktu zat hi an la beitham hle niin a lang.
He inpuhmawhna boruakah hian, khawpui enkawltute indaih loh dan chiang taka tarlan a ni a, hei hi mipui dinhmun ngaihtuahin post awmsa hnawhkhah bakah thawktu post thar siam belh pawh hi a lo tulzia a lang chiang ta zawk niin a hriat ta a. He inpuhmawhna boruak hian AMC tha chakna tur hring chhuak hlauh se a duhawm ta hle a ni.
Thawkkhat lai khan SASCI sum tih lapse chungchanga inpuhmawhna a awm a, mipuiin thudik zawk hriat an duh a, mahse debate-a incho vel bak hriatzui tur a awm leh ta rih lo. Hmanni lawkah certificate lem hmanga sawrkar hnuaia ha daktawr thawk chungchangah thudik hailan a ni a, a mawhphurtute chunga action lak zui a nih dan chiang taka hriatzui tur a awm leh rih ta chuang lo bawk.
Hetianga eng emaw thil rikpui hlut a nih a, thudik tak hriat tur awm zui leh thin lo ang hi kan ‘culture’ pakhat ni tawh maiin a lang. Hetiang thilah hian mipui lam pawhin kan dikna chanvo, kan right hi na takin kan hauh (claim) ngam ve thin tur niawm tak a ni.