AMC-ah vote 19879 awm belh

Kum 2021-a Aizawl Municipal Corporation inthlanpui neih dawn khan voter awm zat chu 220110 a ni a, kumina AMC inthlanpui neih turah voter 239989 awm tawhin, 19879-in a pun belh.
Aizawl Municipal Corporation General Election 2026-a hman tur final electoral roll chu Nilaini khan district election officer Aizawl Er. Lalhriatpuia’n a tlangzarh a. Roll tlangzarh takah hian voter 239989 an awm a, mipa 110333 leh hmeichhia 129656 an ni. Mipa aia hmeichhia an tamna hi 19323 a ni.
Kum 2021 final electoral roll ah voter 220110 awmin, mipa 102084 leh hmeichhia 118026 an awm a, mipa aia hmeichhia tamna hi vote 15942 a ni.
Tun tum final electoral roll-ah hian voter tamna ber ward chu Ward No. XVIII niin, 18906 an awm a. A tlemna ber chu Ward No.VIII niin 7975 an awm.
Voter pun tamna ber chu Ward No.XI niin, 804-in an pung a; voter kiam tamna ber chu Ward No.XIV niin, 210-in an kiam a ni.
Final electoral roll hi State Election Commission Mizoram thuchhuak angin qualifying date atan 01.01.2026 hmanga Electoral Rolls Summary Revision 2026 neiha buatsaih a ni a. AMC inthlanpui neih hun tur chu SEC-in hriattirna a la tichhuak dawn.
AMC Draft Electoral Roll hi 2025 September 24 khan mipui en theiha tarchhuah a ni a. September 25 atanga October 25 chhung roll atanga paih, thun thar, siamthat ngai leh insawn duh tan dilna (claims and objections) hun hawn a ni. Final electoral roll hi 2026 January 7 a peihfela tar chhuah a ni.
DEO chuan AMC electoral roll hi MLA inthlanpui atana electoral roll nen a hranpaa buatsaih a ni a, hemia inthun thar, insawn leh siamthat hi MLA roll atan a rin nghal theih loh tih a sawi a ni.