AMC corporator thar ho lalut Mayor leh midang lalut nghal

Aizawl Municipal Corporation inthlanpui neih zawh taka corporator thlan thar mi 19 chu Ningani khan lakluh an ni a. Mayor leh deputy mayor thlan nghal a ni.
Kaihruaitu Municipal commissioner Joseph H Lalramsanga’n corporator tharte hming a chhiarchhuah zawhah, Aizawl district magistrate Er Lalhriatpuia’n Aizawl Municipality corporator thar 19 chu India Danpui laka rinawmna thutiam laktirin a lalut a. Corporator lakluh an nih hnu hian The Mizoram Municipalities (Procedures & Conduct of Business ) Rules 2007 Section 4 phut angin, mayor leh deputy mayor thlan nghal a ni. Candidate dang an awm loh avangin Rules Section 4 (5) tlawhchhanin mayor atan Ward No.VI corporator H Lalremtluanga leh deputy mayor atan Ward no.XVI corporator R Lalawmpuii te chu tlinga puan an ni. Mayor leh deputy mayor hian thutiam (oath of secrecy) an la nghal bawk.
Mayor thlan thar H Lalremtluanga hian executive corporator tur mi pali – Christina Roluahpuii Sailo (Ward No.VIII), Vanlalhruaia (Ward No.XIII), Vanlalfaka (Ward No.III) leh K Lalrodinga (Ward No.XVIII) a ruat a, executive corporator-te pawh hian thutiam an la ve nghal a ni.
AMC corporator lakluh inkhawm hi chief minister Lalduhoma, Assembly speaker Lalbiakzama, UD&PA minister K Sapdanga bakah minister dang – C Lalsawivunga, Dr Vanlalthlana, B Lalchhanzova, Prof. Lalnilawma, Lalnghinglova Hmar; member of Parliament (Rajya Sabha) K Vanlalvena, adviser to CM Ginzalala, MLA leh MLA Lalchhuanthanga ten an telpui a ni.