Tuikual South Veng huamchhunga awm ‘AMC Multipurpose Hall’ tia vuah chu February 10 khan Aizawl Municipal Corporation chuan hawn a tum a. Khawtlang lamin he building sakna ram leh building chungchangah an duhdan tihhlawhtlin hmasak a nih loh avangin hawn an remti lo.
-- Advertisement --
Tuikual South khawtlang hruaitute sawi danin, an veng huamchhung, Horticulture directorate thlanga awm ‘UT Building’ tia sawi chu ngaihven hlawh lo takin kum engemawzat a ding a, sawrkar tana ngaimawhawm lo leh tangkai tho sia veng ta a nih theihna’n hun rei tak atangin ngaihtuahna an lo seng tawh a; kum 2000 chho atangin a hunlaia chief minister Pu Zoramthanga leh Pu Lal Thanhawla hnenah veng chhung tana pe turin an lo ngen tawh a, a hlawhtlinna an hmu lo.
Kum 2019 vel khan AMC hnuaiah veng tana tangkai thei tur building sak tum a nih thu hria in, veng mipui an phur hle a, UT building pawh veng mipuiin hnatlangin an thiat nghe nghe tih an sawi. An duhthusam ang chiahin a building hi a chhuak dawn lo tih hre chungin, a theih chin chinah veng leh ward tana chhenfakawm a nih theih dan ngaihtuahin, a sak lai hian an duhdan vawi tam an thlen a, a sak phung pawh siam danglam tir a awm tih an sawi a ni.
Building hman dan tur kaihhnawiha tender chhuahah veng thlauhthla zawnga ruahmanna a awm tih hriain kum 2022 khan local council leh YMA branch chuan, a vaia veng tana a rem thei lo a nih pawhin an duhdan hi Aizawl mayor hnenah ziaka thlenin amah an hmu bawk a, chanchin an ngaihchan reng laiin, hawn tumna thu hian a rawn deng ta thut tih an sawi.
Khawtlang ngen ang chuan – building sak thara garage, market leh dawr income zaa 50 Tuikual South Local Council-a luh tir, top floor-a hall chu Tuikual South chanvoa dah, a hmingah Tuikual South Multipurpose Complex tih, Management Committee-ah Tuikual South LC member 2 tal dah, garage/ market/ dawrah Ward-XII atanga dil an awm chuan seat/ dawr awm atanga zaa 80 dahsak te a ni.