AMC inthlanah vote tla tha lo

Aizawl Municipal Corporation inthlanpui 4-na chu Thawhlehni khan neih a ni a, vote tla hi za zelah 62 chuang niin, AMC inthlanpui hnuhnung ber aiin a tla chhe zawk dawn nia ngaih a ni.Zing dar 7.00 atangin vote thlak tan a ni a, polling station pahnih velah electronic voting machine-a buai awm deuh avanga vote thlak hun tih tlai hret tih loh chu buaina leh harsatna dang a awm hriat a ni lo.
State election commissioner Dr H Lalthlangliana chuan, boruak muanawm tak hnuaiah inthlan neih a ni tih a sawi a. Chutihrualin beisei angin vote tla erawh a tam dawn lo nia a lan thu a sawi a ni.
Vote thlak theih hun tawp, tlai dar 5.00 thlenga vote tlak dan hi za zelah 61.14 a ni a, hei hi inthlan ni bik liau liaua vote tla a ni. SEC ruahman anga voter slip la hman leh polling area-a intlar hman, vote la thlak zo lo polling booth thenkhat a awm a. Hei bakah hian home voting leh inthlana duty-te vote thlak nena belhkhawm nen chuan a la sang hret anga, za zelah 62 chuang (62.77% vel) tur nia chhut a ni.
AMC inthlan hnuhnung ber, 2021 khan vote tla chu za zelah 63.49 a ni.
AMC-ah hian voter 239985 an awm a, heng zinga 110335 hi mipa, 129650 hi hmeichhia an ni a. Tlai dar 5.00 thlenga vote tlak dan chu – mipa 66415 leh hmeichhia 80304, a vaiin 146719 a ni a, vote tla hi zaah 61.14 a ni. Home voting leh inthlana duty-te vote belhkhawm nen chuan la sang hret tura ngaih a ni.
Tlai dar 5 thleng hian Ward No. XIX-ah vote a tla tha ber a, zaah 67.22 a ni. Ward No.II chu a tlak chhiatna ber niin zaah 50.52 a tla.
Tarlawn tawh thin angin, inthlan that ngaihna a awm a nih chuan April 23-ah inthlan that a ni anga, vote tla hi April 27 zing dar 8.00 atangin chhiar tan a ni ang. Inthlan kaihhnawih zawng zawng hi April 30-a zawh tawh tura ruahman a ni.