Police engemaw zatin vote thlak lo

West Bengal inthlana duty mek Mizo police engemaw zatin Aizawl Municipal Corporation (AMC) inthlanah vote an thlak lo a, a chhan hriat a ni lo.
Mizoram Police, mi sang bawrin March ni 24-ah Aizawl an chhuahsan a, Assam inthlana an duty zawhah West Bengal inthlanah an duty leh a ni.
Assam hi vote thlak zawh fel hnu April ni 13-ah an chhuahsan a, West Bengal inthlanah an duty mek. West Bengal-ah hian vote an la thlak lo.
Battalion hrang hrang atanga kal an ni a, company 15 vel nia hriat an ni. Company 15 vel an nih chuan mi 1000 vel ni tura ngaih an ni.
Thu dawn danin, Aizawl mi ni lo an awm teuh a, AMC inthlana vote nei lo mi engemaw zat an awm. AMC inthlana vote nei lo hi a zatve vel an ni a, mi dang zawng, Aizawla vote neite chuan tun tum AMC inthlanah hian vote an thlak ve lo.
Sorkar hnathawk, inthlana duty turte chu an hna thawk tura an chhuah hmain vote thlaktir thin an ni a, state danga duty tura kal police-te pawh an chhuah hmain vote thlaktir thin an ni. Tun tumah erawh police engemaw zatte hi vote thlaktir an ni lo a, vote an thlak loh chhan hi hriat a ni lo.
Thu dawn danin, battalion-te chuan an mite state danga kal turte vote thlakna tur hian ruahmanna an siam fel a, an tih tur an ti chungin vote hi an thlak ta chuang lo.