AMC kalphung hrang hrang zirchiang tur Study Team din

Aizawl Municipal Corporation hrang hrang zirchiang a, ruahmanna siam nghal tur an din tawh tih Aizawl mayor H Lalremtluanga chuan a sawi a. Study Team hi executive corporator-ten an hna chanpual theuhah an vil dawn tih a sawi.
Thawhtannia ZPM office-a inkhawmah Aizawl mayor hian, May 12 khan a kaihhruaina hnuaiah AMC officer-ho nen Executive Council an thukhawm a. AMC staff-ten AMC inthlan dawna ZPM manifesto an lo zir nasa hle tih an hre thei a. Hei hi an hmachhawpa anmahni kaihruaitu ber a ni dawn tih a sawi.
An sawihona atangin AMC kalphung zirchiang tur leh ruahmanna siam tur Study Team an din a. Executive corporator-ten an department chan theuh Study Team an vil dawn a, engineer leh officer-te nen an la thukhawm chho zel dawn a; Study Team hi Building Regulation (SD&SM), parking, slaughter house & vety, vending, shop license, SWM & sanitation, streetlights, property tax leh AMC manpower & staffing-ah din a ni tih a sawi.
Kum 15-a upa AMC chu a kal dan a la fel tawk lo hle tih mipuiin an hrechiang a, chu’ng an chak lohna chu zirchianga siamtha turin theihtawp an chhuah dawn tih H Lalremtluanga hian sawiin, “Kan service pek chhuah hrang hrang avanga Aizawl mipui phurrit thin hi AMC-a roreltute phurrit nih tirin, sukiang turin hma kan la dawn. Aizawl tan hnuhma tha, AMC kaihruai lehtu turte tan chhawm tlak hnutchhiah ngei kan tum. Sum dinhmun pawh kan zirchiang mek a, budget tha zawk Aizawl tan neih ngei kan tum. Langtlang sawrkar din kan tum a, kan sum hmuh leh hmanna a tam thei ang ber puanzar kan tum,” a ti.
A bikin, mipui atanga chhiah lakte mipui tan a tam thei ang ber hman let a, a hmanna hriattir an tum tih a sawi a. Heng zawng zawng tihlawhtling tur chuan an ni chauh an tawk loa, Aizawl tha zawk siam turin mipui leh ZPM party-a an lungrualpui zawng zawng thawhpuiah an sawm tih a sawi a ni.
Chief minister leh a thawhpui MLA leh ZPM party hruaitute thlawpna an hmu ta chu AMC-a thawkte pawh an phur a, AMC-in hmel thar a hmu dawn nia hria in, beiseina sang tak nen an thlir tih a sawi bawk.