AMC Playground siam danah sum fel lo a awm niin kan hria – ZPM Thalai

AMC Playground siam danah sum fel lo a awm niin kan hria
– ZPM Thalai
Bawngkawn Brigade-a AMC Playground siamnaah sum fel lo a awm ngei nia an hriat thu ZPM Thalai chuan an sawi.
ZPM Thalai Hqrs thuchhuak chuan, Assembly Session kal meka Lunglei West bialtu Pu T Lalhlimpuia zawhna UD&PA minister-in a chhannaah, Bawngkawn West-a Brigade Field, AMC Playground ni taa sum senso zat chu Rs. 5,04,36,000 a ni tih a ni a. A hmuna an tlawhnaah cheng vaibelchhe 5 chuang hmanralna tur an hmu loa, RTI hmanga AMC an zawhna an chhannaah erawh contractor 16 leh sum senral Rs. 4,20,87,000 a ni, tih niin, RTI hmanga chhanna hi rinhlelhawm an tih thu a sawi.
‘A hmuna kan tlawhnaah hian Brigade field /AMC Playground hi a nih tur ang a nih loh zia kan finfiah a. 2022 March 21-a hawn Lengpui MSSC Sports Complex-a synthetic astroturf football ground, cheng nuai 500 senga sak nen chuan tehkhin chi pawh a ni lo hial. Lengpui khelmual siamna aiia Rs. 46000 a an seng tam zawk chung a, artificial turf pawh phah loh, zim zawk bawk si, inkhelhna tlak loha an chhuah hi kan dem a ni,’ a ti.
Brigade field awmna Bawngkawn West Local Council chairman thil chinchang an zawhfiahnaah, field siam puitlin hun an nghahhleh zia leh nuai 500 chuang sen a nih tawh hnuah hmantlak loha a zuzi ta mai chu pawi an tiin, veng mipui pawh an lawm lo tih a sawi a. Bawngkawn West tan mai ni lo, veng thenawmte thlenga thlakhlelhawm, Brigade field sum siamna atana hmangtute hi an dem tih a lo hrilh thu ZPM Thalai hian an sawi.
‘He khelmual hi a nihna angin tih puitling nise, Mizo thalai, a bikin Aizawl thalaite chhawr tur infiamna hmunhma pawimawh a ni. MNF kaihhruai AMC-in political party worker inhlawhna mai maia an hmang leh, hna tha thawh aia mi 18 hnena an sem sawm hi Aizawl thalai hmuhsitnaah kan ngai a, thalaite infiamna hmunhmaa inhlawh an lo ching hi MNF kaihhruai state sawrkarah mai ni lo, MNF kaihhruai AMC-ah pawh a lo awm lehzel hi a vanduaithlak a ni,’ thuchhuah chuan a ti.