Amit Shah-a’n Manipur tlawh dawn

Union Home Minister Amit Shah chuan May 29 hian buainain a chim mek Manipur chu a tlawh dawn.
He thu hi Union Minister of State for Home Nityanand Rai-in a sawi a ni a. “Union Home Minister Amit Shah chu ‘ethnic crisis’ chinfel a nih theih nan ni thum chhung a cham ang” tiin Rai chuan a sawi a.
“Hmun hrang hrangah mipuite nena inbiakna neih a ni ang a, an thlirna leh ngaihdan te ngaihtlak a ni ang,” tiin Rai chuan a sawi bawk.
Tuna buaina awm mek chuan hmasawnna chauh a tibahlah tia sawiin Rai chuan tun hnai kum kua chhungin kawngpui dan chah leh lungawilohna te pawh awm lovin hun hman a ni tawh zawk a ti bawk a.
Kar kalta Ningani khan Shah chuan Manipur mipuite chu remna leh muanna lam hawia ke pen turin ngenna a lo siam tawh bawk.
Shah hian Assam-a Kamrup district-a National Forensic Sciences University (NFSU) campus, Chansari ah lungphum a phum dawn a, chumi hnuah Manipur a pan dawn a ni.
“Manipur ka pan nghal ang a, ni thum chhung ka cham ang a, pawl pahnih te chuan inrinlohna hnawlin state-ah remna leh muanna a awm theih nan hma an la tur a ni,” tiin a sawi a.
“Centre chuan intihbuainaah a tuartu tinte tan dikna a dinchantir ang a. Mahse, inremna a awm theih nan inbiakna neih ngei a ngai a ni,” tiin Shah chuana sawi bawk.
Tuna buaina chhuah hma kum ruk chhungin Manipur-ah indanchah emaw nawrhna emaw a awm ngai lo chutiang dinhmunah chuan let leh a ngai a ni, a ti bawk a. “Inbiakna hmang chauhin remna leh muanna neih theih a ni” tiin a sawi bawk.
Manipur buaina hi May 3 a Meitei community tena Scheduled Tribe (ST) status an ngiat duh lova ‘Tribal Solidarity March’ tribal mipui tena an huaihawt atanga chhuak a ni a.
He mi hma hian Kuki villagers te chu reserve forest ram atanga nawrchhuahin an lo awm tawh a, chuvang chuan lungawilohna tenaute kalpui a lo ni sa tawh bawk.
Manipur-a mihring cheng 53% te chu Meitei nia ngaih niin Imphal Valley-ah an cheng ber a. Tribals- Nagas leh Kukis te chu 40% vel niin hill district-ah an cheng thung.