Conrad-a’n Meghalaya pui turin Centre kar

Meghalaya Chief Minister Conrad Sangma chuan Centre chu Meghalaya ten billion dollar economy a nih theih nan leh India rama state top 10 a nih theih nana pui turin a ngen.
NITI Aayog 8th Governing Council meeting neihnaah Conrad chuan a awmna leh kilkhawrna avangin Meghalaya chu state dang nena ang khata en lo turin a ngen a.
NITI Aayog chuan ram pum hisapin zone-wise planning a kalpui a ngai tiin Conrad chuan a sawi a, “State tin hian danglamna a nei vek a, harsatna leh thatna a neih te pawh a danglam a ni,” a ti bawk a.
Chutih laiin Prime Minister Narendra Modi chuan state te chu Budget pharh tirh atanga thla thum (April-June) chu hmang tangkai zual tur leh sum lama inrenchema thutlukna siam thin turin a ngen a.
“A bik takin hill state te furpui intan hma leh hun duh rei si ah chuan harsatna awm theite nasa takin a sukiang dawn a ni,” tiin Modi chuan a sawi.
Prime Minister chuan Centre leh States te bakah UT te chuan long-term common vision neiin India chu kum 2027-ah developed ram nihtir hman tum a ngai a ti bawk.
NITI Aayog inhmuh-khawmnaah hian chhan hrang hrang avangin chief minister 11 vel lai an tel thei lo va, agenda pariat vel awmin kum 2047-a India developed ram nih tir hman chungchang te, micro, small and medium enterprises, infrastructure and investments; minimising compliances; empowering women; health and nutrition; skill development; leh Gati Shakti for area development and social infrastructure te chu sawiho zinga tel a ni.
NITI Aayog Chief Executive Officer BVR Subrahmanyam chuan NITI Aayog plan chungchang sawiin state-support mission an kalpui thu a sawi a. “NITI-type institution kan siam ang a, kan tum chu state 35 leh UT tena NITI-type institution an neih a ni,” tiin Subramanyam chuan a sawi.