Amsterdam-ah ruihhlo kawla puhin Nicki Minaj an man

Amsterdam-ah ruihhlo kawla
puhin Nicki Minaj an man
Superstar rapper Nicki Minaj, kum 41, chu May ni 25 khan Mancester, England-a perform tur a ni a, mahse, UK pan a tum mek laiin Armsterdam-ah an man ta a ni.
Minaj hian an man lai vel hi Instagram Live video-ah a tilang a, fans lamin social media-ah an post darh zui ta a ni. Video clip-ah chuan Amsterdam official-in Minaj chu drugs a kawl avanga hren an tum thu a sawi a, Minaj erawhin dan phal loh engmah a keng lo niin a sawi ve thung.
Minaj hian Pink Friday 2 Tour a neih mekah Inrinni zan khan Manchester-a Co-Op Live a perform tur a ni a. “A nih leh chu min man tihna em ni?” tiin a zawt leh a, official chuan, “Aw” a lo ti a, clip-ah chuan Minaj hi a duh lo chung police van-ah an hruai lut lai langin, a tawp zui ta a ni.
Minaj hi police station-ah case an siam sak ta em tih engmah puan chian a la awm lo va, Royal Neterlands Marechaussee military police thupuangtu chuan American hmeichhe pakhat ruihhlo nêm deuh chi kawl avanga an man thu a puang a, mahse, tunge an man tih a puang lo va, eng drugs nge a kawl tih pawh a puang lo.
Promoter Live Nation chuan Manchester-a Minaj perform tur hi a hun an sawn tur thu an puang a, mahse, engtik atan nge an sawn tih erawh an puang lo a, original ticket chu a hman zui theih tur thu an puang tel bawk.
Live Nation chuan thuchhuah siamin, “Nicki hian zanin hun hi hman ngei tumin kawng hrang hrang a dap nain, vawiin thil thleng avangin a rem ta ngang lo. He harsatna avang hian pawi kan ti takzet a ni,” an ti.
Minaj hian a hnu deuhah X-ah thu post-in, “Jail cell-ah darkar 5-6 vel ka thu ve ren rawn,” a ti a, “Zan show tur hi hun dangah kan nei leh thuai ang, a hun tur pawh kan puang thuai ang…” a ti bawk.
Nimin khan Minaj hian video dang a share leh a, chutah chuan airport official-in thuneitu ten a bag an endik duh thu a hrilh a. Minaj chuan X-ah, “Tichuan tip an hmuh thu an sawi a, la zial loh chu a bûk tur an rawn kal dawn an ti a,” a ti a, a hnu deuhah a chuanna thlawhtheihna chu rei ngial an tihkhawtlai thu a post leh bawk.
Minaj chuan, “Hei hi min lo hriatpui ru, ka phalna la hmasa loin ka bag an la,” a ti a, Amsterdam-ah tip (marijuana) chu phalrai a nih thu sawi pahin, “Ka security-in la zial loh (pre-roll) te chu ama ta a nih thu te pawh a hrilh a,” a ti bawk.