An ‘benched’ tawh thin che em?

An ‘benched’ tawh thin che em?
Relationship tawngkam thar a chhuak ve deuh reng a, chung zingah slang pakhat chu ‘benched’ tih hi a ni. Relationship lama tawngkam lar zual deuh te chu ‘no strings attached’, ‘friends with benefits’, ‘ghosting’ leh tunah chuan ‘benching’ tihte a ni ta zel a. A awmzia kan hria em aw?
A awmzia leh a kawh tum hi a romantic vak lem lo. ‘No strings attached’ tih chu inngaihzawnna pawh awm chuang lo, rilru lama inthlun zawmna awm lem lo va nuamtawl nana inhman tawn a ni deuh ber. ‘Friends with benefits’ pawh hi inngaizawng ni lem lo, thian anga inen chunga inngaizawng te tih thin ang tih ve a ni leh mai.
‘Ghosting’ hi a duhawm lem lo, ngaihzawng te emaw, kan lo date ve zeuh zeuh tawh te emaw ngaihthah luih tlat a, kan inkar chhutchah hlen hmak tum sawina a ni ve leh thung.
‘Benching’ pawh hi a tawngtu tan chuan ngeiawm tak a ni. Duh tak tak mang si lo, thlah dawn a ui rilru deuh bawk si, engtin emaw a pawh beh deuh hram hram ang dinhmun vel sawina a ni.
Football khelhnaa substitute bench a thut ang vel a ni. Thlak ngai an awm palh a thlaktu tur, thlak ngai an awm loh hlauh chuan inkhel ve lo tur, mahse, team atanga an paih phal chiah si loh ang vel a ni.
A text fo che a, a call zeuh zeuh bawk che, mahse, inhmuh tak tak tak chu a awm ngai chuang lo. A duh ve deuh chein i hria a, mahse, inpahnih a awm dunna hun tak tak erawh in nei ngai lo. Chutiang chu i tawng a nih chuan a ‘benched’ che tihna a ni. Thlah daih che chu a ui ve deuh si a, mahse, nang aia duhzawk a nei si a, a duh zawk chu a remchan loh palh takin tiin, engtin emaw a uai bet ve hram hram lek che tihna a ni.