Thirhip-theia’n record siam

Thirhip-theia’n record siam
Talent danglam tak tak nei an awm thin a, he Iranian pa talent pawh hi a danglam khawp mai, a taksa-ah thil chi hrang hrang a hip bet thei! A hming chu Abolfazl Saber Mokhtari a ni a, kum 54 mi a ni ve tawh, a taksa-ah thirfian 96 a hip bet a, Guinness World Record a vawi thum nan a siam ta.
Abolfazl hian hetiang record hi tum hnih a lo siam tawh a, 2021 khan a record hmasa ber siamin, chumi tum chuan a taksaah thirfian 85 a hip bet a, he record hi 2023 khan amah bawkin rawn khum lehin, thirfian 88 a taksaah hip bet leh a, tunah thirfian 96-in record thar a rawn siam leh ta a ni.
Abolfazl chuan a talent hi a puitlin hnua a neih thar thut ni loin, a naupan lai atang tawhin a taksaa thil hip beh hi a lo ti fo tawh niin a sawi a, “Ka naupan deuh lai atangin hetiang hi ka ti thei tawh a, mahse, ka tingun telh telh a, kum tam ka tih hnuah chuan a kawng hmang te ka hriatbelh ve zel a, ka talent pawh a lo pung a, tun hi ka lo thleng thei ta a ni,” a ti.
Abolfazl chuan thir lam chi chauh ni lo pawh a taksa hian a hip thei ni a sawiin, “Engkim a ni mai, a ni deuh tak tak. Thil sakhat tawh phawt chu ka hip bet thei deuh vek. Thil sakhat, kuta khawih theih eng chi pawh ka taksaah a bet thei a, plastic, darthlalang, thei, lung, thing leh mihring chenin,” a ti.