Hlawhtlinna hi ‘click chhuah’ a ni lo, ‘thawh chhuah’ zawk a ni – Lalduhoma
Hlawhtlinna leh hmasawnna chu ‘click chhuah’ chi a ni loa, ‘thawh chhuah’ zawk a ni tih chief minister Lalduhoma chuan a sawi a. A tha lo zawnga internet intihbuai tir lo turin zirlaite a chah. School Education department-in chuan Mizoram Board of School Education Examination-in HSSLC leh HSLC topper-te hnenah Chief Minister’s Award a hlan thin chu kumina topper-te hnenah Zirtawpni khan a hlan a. Hmanpuitu chief minister chuan, Mizoram chu ziak leh chhiar thiam tamna state a ni a, report thar ber chhuak turah India rama ziak leh chhiar thiam tamna ber state kan ni dawn nia hriat a ni tih a sawi.
“Ziak leh chhiar thiam tamna ber state, chhawr tlak lehkhathiam tlemna ni si kan ni ang tih a hlauhawm a, chhawr tlak ngei nih tum ang u,” a ti. Zirna sang zawk lamah kan thalaite in kal nasat a tul hle, tiin, Mizoram-in scientist leh researcher kan la ngah tawk lo tih a sawi.
Social media platform a tamin smart phone kan nei deuh vek tawh si a. Zirlaiten an hmang thiam loang tih a hlau tia sawiin, “Vawiina kan chawimawi topper-te hi chu internet hian a tibuai lo tih a chiang. Nimahse, a tihbuai zirlai tam tak, an hun tam ber screen hmaa hmang thin hi kan ngah a ni,” a ti.
Mobile phone, computer leh smart TV hmanga thil en leh game khelh chuan eng thil tha mah a pe tak tak lo, tia zirlaite fuihin, “Suangtuahna khawvelah nasa takin a chentir che a, a tak ramah a chang thei si lo. Mi beidawngah a siam thei zawk che a ni. Hlawhtlinna leh hmasawnna hi ‘click chhuah’ a ni loa, ‘thawh chhuah’ zawk a ni. Mi hlawhtling ni tura i mamawh dik tak, i tih tur dik tak chu lehkha zir a ni,” a ti.
Chawimawina hlante chu:
8 HSSLC topper (Science) – Cynthia Lalhlupuii Shangpliang, Falkland Veng (St.Paul’s HSS)
8 HSSLC topper (Commerce) – Kristin Laldinpuii Ralte College Veng Aizawl (Oikos HSS)
8 HSSLC topper (Arts) – Lalrammawii Tochhawng Khatla East (Mt. Carmel School)
8 HSLC topper – PC Lalthakimi Armed Veng (KD High School)
8 Chawimawina sumfai Rs. 50000, memento leh citation hlan an ni