An group lerah Barca nghet zel

An group lerah Barca nghet zel
Ferran Torres stars ilansarhna inkhelah Thawhlehni zan khan Group H hmahruaitu Barcelona chuan 2-1-ina an mikhual Shakhtar Donetsk hneh lehin, khelh thuma point kua nen an hmahruaina an sawhnghet.
Nou Camp inkhelah hian Manchester City forward hlui Torres chuan minute 28-a Catalan team hmahruaina a thun bakah minute 36-a Fermin Lopez goal tur a siamsak a; a hmain Lopez hian goal ban a petper a, chumi ball letleh hmang chuan Torres-a’n goal hmahruai a thun phah a, an inchawmtawn a ni ber.
Ti hian, season kal laiah Ferran Torres hian Barcelona tan game 12 khelin goal nga a thun tling ta a ni.
Shakhtar goal neihchhun hi second half tir lama Heorhii Sudakov thun niin, mikhualin hei bak goal an khung belh zo lo a, an kawtkaiah vawinga champion tawh Barcelona-in point thum an thawkchhuak leh.
La Liga champion hian kum 2015 hnu lamah a vawikhatna atan Champions League trophy an beisei leh mek a, an group match hmasa pathumah hnehna an chang.
Point thum nei ve tawh Shakhtar hian Group H table-ah pathumna an luah a, a mawng-berah point la hmu ve lo Royal Antwerp awmin, Thawhlehni zan inkhel dangah Antwerp hi an mikhual FC Porto chuan 4-1-in an sawp a, forward Evanilson chuan hat-trick siam nghe nghein, Portuguese club hian point ruk hum chungin pahnihna an luah chhunzawm.
Barcelona hian player pawimawh inhliam leh hrem tawk an kawl nual avangin Shakhtar Donetsk an mikhual tum pawh khan centre-forward Robert Lewandowski an chhawr thei lo a, an buaina belhchhah turin second half minute 74-ah hliam avangin Joao Felix a baichhuak leh a, Inrinni El Clasico league match-a an hmelma kumhlun Real Madrid an hmachhawn hunah pawh Torres chu an innghahna lian a nih chhunzawm mai a ngaih hmel.
Kum 23 mi lek la ni chungin Ferran Torres hian a zawnin Champions League game hnihah goal a khung ta reng mai a, Cata-lan team hmatawng pawimawh a nih chhoh zel beiseina a lian.
Barcelona hian rawlthar kum 16 mi Lamine Yamal chu a vawi-hnihna atan Champions League-ah starting eleven an chantir leh a; Pathianni liamta maia Athletic Bilbao laka a debut nghakchhuak kum 17-a upa Marc Guiu chuan Shakhtar Donetsk game-ah khan hun tawp dawnah khelmual a lut.
Lewandowski bakah hliamin a bawhbuai mek dang – Raphinha, Sergi Roberto, Frenkie De Jong, Jules Kounde leh Pedri an chhawr theih loh laiin FC Porto an tum tuma hnawhchhuah midfielder Gavi pawh an la chhawr thei lo a, Barca manager Xavi Hernandez chuan Lopez telin academy player pariat ngawt Europe game atan khan first team-ah a senglut a, Shakhtar hneh turin an la tha tawk tho!