An kawtkaia chak nuamsa Arsenal

An kawtkaia chak nuamsa Arsenal
Si hnih faia an mikhual Everton hneh chungin Arsenal chuan hmahruaitu Manchester City chu Premier League table-ah point an nihrual a, pahnihna an luah.
Mipui 60,207 teh meuh inkhel entu an awm laiin Emirates Stadium-ah goal a lut hma hle a, minute 7 an khelh tlin hma chiahin defender Ezri Konsa chuan mualneitu team hamhruaina goal a khung.
Minute 68-a an goal hnihna thawhtu Gabriel Magalhaes pawh kha centre-back ve bawk niin, tun kha Premier League game 200 a khelh tlinna chiah a ni a, mellung pawimawh a phun zanah a hlawhtlinna goal hmangin a lawm.
Konsa goal kha top flight season kal laia set-piece atanga Gunners goal an hmuh hmasakber niin, mikhual lam tan James Garner leh Tyrique George-te’n tha takin ball thawnlut ve bawk mah se home keeper David Raya an paltlang zo lo.
A tir lam minute 45 chhung khan north London club-in inkhel an thunun hleh hle a, corner vawi 10 tehreng an chhuih bakah shot pawh tum 13 ngawt an nei hman.
Hun tawp dawnah Everton lamin arte lukawn dal chance an hmu a, mahse, Kiernan Dewsbury-Hall chuan goal sirah a tauh chhuak hlauh.
Birmingham khaw lama an elpui lian ber Manchester City an tlawm avangin Arsenal hian point thuma Etihad club an phak lohna kha an nihrualpui ta chiah a, north London club tan an title kawl lai humhim tuma season bul an tan chhoh leh mekah an dinhmun a tha leh tawh hle a ni.
Arsenal khan Inrinni zanah bul an tan khawng a, artin Odegaard-a corner pet chuan Everton box chhungah buaina thlen nghalin, England goalkeeper Jordan Pickford chuan ball hlauhawm a thianfai zo lo a, Konsa chuan north London club tana a goal hmasaber a hlawhchhuak ve ta hial a ni.
Kha set-piece goal kha kumin May thla hnu lama Arsenal set-piece goal hmaa ber niin, inelna hrang hrang belhkhawm game 13 chhunga a vawi khatna a ni nghal bawk.
England centre-back Konsa chuan champion lai an nih ang takin an hmachhawn game apianga hnehna chanzel chu an hmachhawp a nih thu leh an home-ah lehnghal chuan a theih anga tam hnehna chan an duh tih inkhelh banah a sawi.
Brazilian defender Magalhaes khan goal a thun bakah a hna dik tak zawk goal venhim lamah pawh a duty a hlenchhuak tha leh hle a; first half chhungin goal-line clearance pawimawh tak a nei a, kha mi hmang khan Arsenal-in an hmahruaina an humhim thei hram a ni.
Manager Mikel Arteta pawhin Magalhaes a fak duhthawh hle a, khawvela centre-back tha berte zinga pakhat a nih thu sawi chhuak hialin, team pahnih box chhunga a chet dan chhuanawm a tih thu leh a leadership pawh fak tlak a nih thu hahipin a sawi.
Inrinni goal nen Magalhaes khan defender ni chungin Arsenal tan Premier League goal 21 zet a tilut tling tawh a, a centre-back pui Konsa pawhin top player a nih mai bakah mihring mihrinna kawngah pawh pa duhawm tawp thang a nih thu sawi chungin, “He hmun ka lo thlen hnu khan amah avangin ka hringnun hi a awlsam phah sawt a, a kianga khelh hi a hlimawm takzet a ni,” a ti chhuak hial!
Inkhel dang
Inrinni zan Premier League match dangah London club ve bawk Fulham pawh an chak ve bauh a, Coventry City laka 1-0 hnehna kha league season kal laia an vawi hnih chakna chiah niin, khelh riata point riat nen table-ah 13-na an luah.
Coventry Building Society Arena, Coventry, Britain-a goal awmchhun lut leh Cottagers chakna goal ni zui nghal kha Oscar Bobb-a tihluh niin, ding lam sira a ball chan chu box chhungah a luhpui a, Coventry midfielder Jack Rudoni a bum hnuah kual mawi zetin chakna goal awmchhun a khung.
Minute 80-a goal awmchhun a tihluh hma khan coach lamin Norwegian right winger Bobb kha thlak an lo tum hman a, mahse, hnehna pawimawh chanpuitu a ni ta zawk a ni.