Pathianni zana an mikhual Real Sociedad nen goal awm loa an inhnehtawk hnuah Real Madrid chuan an chung chiaha hmahruaitu Barce-lona nena an inkar an pawtzim zo lo a, Inrinni zana Girona hnehtu Catalan team lakah point ngaa hniamin, an hnuai chiaha pathumna luahtu Sociedad nen point thum bawkin la inthlau chhunzawm mah se La Liga title beiseina erawh a tlahniam leh hret.
-- Advertisement --
Santiago Bernabeu inkhelah hian Brazil winger Vinicius Junior chuan vawi-thum zet target fuhin ball thawnlut bawk mah se mikhual goal-veng Alex Remiro chuan a dansak fai vek a; hei lo pawh hi Real goal tur a dang nual a, mikhual team tana point hlawhchhuaktu langsarber a tih theih ang.
Hun pumin Real Mad-rid lam khan goal attempt tum 20 ngawt nei tlingin, mikhual team khan vawi sarih an nei ve bawk.
Hnai fahran atanga vawihnih Vinicius Jr goal tur dansaktu Remiro khan Karim Benzema, Toni Kroos leh Rodrygo goal tur dang bawkin, inkhelh bana Movistar Plus-in an kawm-naah pawh point an hlawh-chhuak leh mimala a chet-that avanga a hlim em em thu sawi chungin anni lam pawhin chance an hloh ve nual tho tih a sawi a, draw kha an hlimpui tih a tarlang tel.
La Liga champion lai Real khan hun pumin ball 70% dawn an chang a, Real Sociedad lam chance neih ve ho kha counter-attack atangin a ni ber.
Goalkeeper Thibaut Courtois pawhin second half tir lam minute 60-ah hna hautak a hmachhawn ve zawk a, lei hrul deuh thawa Takefusa Kubo ball thawnluh chu pui takin a dansak.
Real Madrid elpui lian Atletico Madrid chuan Pa-thianni zan inkhel dangah substitute Saul Niguez-a goal awmchhun hmanga mualneitu Osasuna hneh-in table-ah palina an thut.
Real Valladolid pawhin sikhat fai bawkin an mi-khual Valencia an hneh a; Celta Vigo mualah sikhat faiin Athletic Bilbao an tlawm ve thung.