An kawtkaiah Milan an tla!

An kawtkaiah Milan an tla!
First leg-a sikhat faia tlawm tawh AC Milan chuan Thawhlehni zan Champions League knockout round play-off second leg-ah Netherlands rama an tlawm tawhna chhanglet zo loin 1-1 draw bak an pel zo lo a, vawihnih inkhelh belhkhawmah 2-1-a tlawmin last 16 an lut zo lo.
San Siro Stadium-ah hian mualneitu team-in goal thun mai an harsat lo a, an thah fel hlawt tihah minute khat pawh a liam hma second 36-na lekah Santiago Gimenez chuan a club hlui lamah goal khungin, kha kha tun season Champions League kal laia goal lut rang ber a ni zui ta nghe nghe.
Italian fans tan beiseina a sang hman hle dawn tih a chiang a, mahse, Milan hian first half chhungin goal an khung belh zo lo mai ni loin second half tir lam minute 51-na lekah an full-back Theo Hernandez chu yellow card vawihnih hmuh vangin hnawhchhuah a ni a, player 10-a an khel ta kha Serie A club-in an tuar ta a ni.
Minute 73-ah Feyenoord substitute Julian Carranza chuan Dutch team tlangna goal pawimawh ni zui ta thunin, kha kha Champions League-a goal a khung vawikhatna a ni nghe nghe.
Zirtawpni last-16 draw lamah Feyenoord hian Inter Milan emaw Arsenal emaw an tum thei dawn a, round of 16 hi thla thara khelh tur a ni.
Nikum December thlaa Paulo Fonseca thlaka Milan boss rawn ni chho ta Sergio Conceicao a lawm lo a, “Ka tan hlohna lian a ni a, tihsual ka nei tam deuh a ni.
“He tlawmnaah hian mawh ka phur a, kha aia rilru paukhauh zawk pu tur kha kan ni. Last 16 luh zawh loh hian min tihnual takzet a, hnawhchhuah tawk Theo leh midang zawng zawngte ai pawhin ka hnual ang. A chhan pawh mawhphurtu dik tak ka ni a; Theo hi chuan Milan tan thil tamtak a pe tawh a ni,” tiin red card hmuh vanga indawmkun a player hnemna thu a chhakchhuak nghal.
|um sarih tehreng European champion lo ni ve tawh AC Milan khan Christian Pulisic leh Malick Thiaw-te thawhrah atanga Mexico international Gimenez-a goal hmangin bul an tan fuh eltiang a, mahse, goal dang thun an harsat piahlamah a tlem zawk nihna an tuar na deuh niin an coach tawngkam atangin a hriat theih.
San Siro hamrik hnuhnung ber rik ruala inbakkaihna chhuakah right-back Givairo Read chu tharum a thawh avangin red card hmanga hrem a ni a, Dutch club tan last 16 a khel ve thei dawn lo.
Feyenoord tan tun kha kum 1974 hnu lam European club competition lian bera last 16 an luh leh vawikhatna niin, kum 1970 khan Dutch team lian hian San Siro stadium-ah bawk hian Scottish club Celtic hnehin European Cup an lo hlawhchhuak ve tawh a ni.
European football powerhouse hial lo ni ve tawh thin Milan thung chuan 2013-14 season hnu lamah Champions League last 16 vawikhat chiah an la chuangkai zo.
Chu chu 2022-23 season kha niin, khatih laia an head coach Stefano Pioli ho khan semi-final an lut a; Pioli ho tho hian kum 2022-ah kum 11 chhunga a vawikhatna atan Serie A title an hlawhchhuak nghe nghe.
Season liamta tawp rual khan kum nga an rawih hnuah Stefano Pioli a chhuak a, kha mi hnu khan Rossoneri hian thawhkan tih ni reng reng an nei leh thei ta rih lo a; Porto boss hlui Conceicao pawhin Champions League last 16 a luhpui zo ta lo a ni.
Conceicao ho hian Serie A table lamah pawh Milan an ropui chuang lo a, tunah hian pariatna ni duaiin, season thara European football an khelh phak dawn leh dawn loh pawh a chiang lo zel rih!
Milan hian Conference League play-off round khelh phakna hmuna thu mek parukna Fiorentina chu point khatin an la pha lo a; Champions Leagu khelh phakna hmun hniam ber palina luahtu Juventus lakah phei chuan point nga zetin an hniam.
San Siro-a a hna thar a zawm hnu lawkah Conceicao chuan an hmelma lian Inter Milan laka hnehna chanpuiin a club thar Milan chu Italian Super Cup a lakpui a, fak pawh a hlawh nghal hle a, mahse, hmasawnna dangin a bawm tak loh avangin Conceicao laka ‘pressure’ a inchhek khawl zel chu a nih hi!