An kawtkaiah PSG chak nuamsa
An kawtkaiah PSG chak nuamsa
Parc des Princes-a mipui 47,151 pungkhawm hmaah Nilaini zan khan champion lai Paris St-Germain chuan UEFA Champions League title an kawl lai humhim tura an chetchhuah vawi khatnaah eng harsatna mah an tawk lo a, League Stage bul an tanna inkhelah hian sili fai tehrengin an mikhual Atalanta an sawp!
Kumin May thla final-ah pawh khan 5-0 ngawta an tumpui Inter Milan sawp chungin an club chanchina a vawi khatna atan European champion nihna an sualchhuak a, kha mi hnua Champions League match an khelh leh hmasakberah pawh goal thun kawngah bahlah an nei lo a, an khelmual hman thiamah Serie A club kha inkhelh an zirtir a ni ber!
He inkhela goal hmahruai hi tan atanga minute thumna leka captain Marquinhos tihluh niin, vei lam sir atanga lei hrula Fabian Ruiz-a cross chu holam takin a chhuah duh lo!
PSG hian goal thun theihna hun remchang nei zui chho mawlh mawlh mah se Nuno Mendes chuan goal ban sirah a petchhuak a; rawlthar Senny Mayulu goal tur chu danpersak niin, Atalanta goalkeeper chhe lo tak Marco Carnesecchi chuan Bradley Barcola leh Achraf Haikimi-te goal tur a dansak bawk.
Heti chung chung hian mualneitu team lamin first half-ah goal khat dang an khung belh leh ta tho a, tuntum chu minute 39-a Khvicha Kvaratskhelia ‘solo goal’ pui tak niin, mikhual tlarhnung a pelh hnuah pen 18 vela hla atangin an goal hnihna a thun er zawk a, half time-ah PSG-in sihnih faiin hma an hruai phawt.
PSG boss Luis Enrique kha a inrintawk h mel hle a, first half kha a tactic hrilh a thawk tha em tih hmuhchian duhin inkhel enna dawhsan zawk atangin a thlir a; Marquinhos laka Yunus Musah foul avangin a pawlte’n penalty hmuin Barcola spot-kick chhuih chu harsa lo takin mikhual goal-veng Carnesecchi chuan a dansak.
Hliam avanga Ousmane Dembele leh Desire Doue chhawr thei lo mah se Enrique first eleven remchhuah kha Italian club hneh turin an tha tawk a; second half tan atanga minute nga a liam leh rualin Nuno Mendes chuan PSG goal thumna a thawh a, chak tur a chiang zual!
Southampton boss hlui Ivan Juric-a hoa Paris khelmual lut Atalanta lam khan home goalkeeper Lucas Chevalier an enchhin zo lo a ni ber a; sithum an chhuah tawh hnu hun pekbelh tan tir lamah Raoul Bellanova backpass fuh lo nangchingin substitute Goncalo Ramos chuan PSG goal lina leh sili faia mualneitu team chakna goal ni zui ta a khung.
October thla hian PSG tan Champions League game harsa zawk tura ngaih khelh tur a awm dawn a, a hmasa zawkah Barcelona luhkhungin, Bayer Leverkusen khelmual an lut dawn bawk a; November thla home match pahnihah Bayern Munich leh Tottenham an su zui leh ang.
Atalanta khan September ni 30, Thawhlehniah Club Brugge an mikhual thung dawn a ni.
Nilaini UEFA Champions League
League Stage result
Olympiakos 0-0 Pafos
Slavia Prague 2-2 Bodo / Glimt
Ajax 0-2 Inter Milan
Bayern Munich 3-1 Chelsea
Liverpool 3-2 Atletico Madrid
PSG 4-0 Atalanta