An mualah United an vanduai

April 13, Ningani zan khan UEFA Europa League quarter-final thawhkhatna khelh a ni a. Premier League club lian Manchester United chu Old Trafford-a an mikhual Sevilla lakah vanduaithlak takin an chak zo lo. Inkhel dangah Juventus an chak laiin Roma an tlawm thung.
Bul tan tha, a tawp khar chhia United
Mizo thufingah chuan ‘Bul tan that hi a zahve zawh ang ni’ tih a awm a. Sevilla laka bul tan tha Manchester United erawh chuan a tawp a khar chhe thung a. Minute 21 chhung leka goal hnih an thun chu hun tawp dawn hnaih minute 10 chhung lekin an mahni ngeiin an sut a. Sevilla nen an inkhel tuma goal awm zawng zawng hi an mahni thun vek a ni a, 2-2 in an inhnehtawk thung.
United hian Old Trafford-a an mikhual Sevilla lakah bul an tan tha a, ball chang tak zawk an nih bakah goal thun theihna hun tha ngah zawk an ni bawk. Goal thun ngei tumin an mikhualte an nawr a, an phu ang ngeiin goal pawh an thun thuai. Minute 14-na lekah Bruno Fernandes ball pek fing tak chu Marcel Sabitzer chuan chiang zeta pet goal in hmahruaina goal a thun.
Hma takah goal an thun vangin United an phur a, an khel tha zui viau bawk. La Liga club in goal thun tuma an nawr luat an tuar lova, minute 21-naah goal an chhuah belh. United hian fuh zetin an nawr let a. Anthony Martial chuan thui tak ball a tlanpui hnuin, mawi zetin a khalh kual te te a, fing leh fuh zetin Marcel Sabitzer tan a chhawpsak a. United hi Bayen Munich atanga an hawh mek Sabitzer hian fuh taka pet goal in an goal hnihna a thun. Bayern Munich atanga United a hun hmang mek Sabitzer hian loan-a a awm mek United tan game khata goal hnih a thun vawi khatna a ni a. Sevilla laka goal hnih a thun nen khan United tan goal thum a thun tling ta chiah a ni.
Old Trafford ah hma taka goal hnih an chhuah vangin Europa League-a hnuhma nei tha ber Sevilla tan chet a har a, an si phurh sut turin hun tha an insiam hleithei meuh lo. United hian La Liga hmahruaitu Barcelona an lo hnawhchhuah tawh vangin Sevilla tan tawh an khirh hle tura ngaih a ni sa a, United pawhin vawi thum an hneh theih loh zawn tawh Sevilla hi hneh ngei an tum viau bawk.
United hian Marcel Sabitzer goal thun hmangin hun rei tak chhung hma an hruai a, an mualah hnehna an chang ngei tura ngaih an ni hman hial tawh. Hun tawp dawn hnaihah an tan vanduaina thuah thum a thleng a, own-goal vawi hnih ngawt an neih bakah an defender pawimawh Lisandro Martinez hliam vanga lak chhuah a ngaih vangin player tlem zawk chung an khelh tluan a ngai a. Goal hnih ngawt an chhuah zui ta reng bawk.
United lakah tlawm ngei tura ngaih tawh Sevilla hian hun tawp dawn hnaih minute 82-naah goal an thawkchhuak ta nawlh. Ding lam sir atanga Jesus Navas ball pet luh chu United rawlthar Tyrell Malacia chuan rang zetin an lamah a dang pial lut a, an si phurh an sut then.
Malacia own-goal hmanga an si phurh an sut then vangin Sevilla an phur thar leh zual a, player tam zawk an ni bawk nen huaisen takin an khingpuite an nawr. Taima taka tan an khawh rah an seng a, minute 90+2-ah an si phurh an sut zo ta nge nge. Minute 90+2-naah hian Youssef En-Nesyri ball tauh na tak chuan United defender Harry Maguire lu a fuh a, si nghak David de Gea rin lohna lamah chiang zetin a goal a, an si phurh an sut. Hun tawp thlenga goal dang a luh belh theih tawh loh vangin Manchester United leh Sevilla te chu semi-final thawh khatnaah 2-2 in an inhnehtawk ta a ni.
United hian tunhnaiah Sevilla an hneh hleithei lova, La Liga club lian nen an intum hnuhnung vawi linah vawi hnih tlawm zawkah an tang a. Vawi hnih dang an inhnehtawk. Karleh ninga zan khian semi-final thawh hnihna an khel zui leh nghal dawn a. Mimualah United in chak ngei an mamawh dawn.
Sevilla laka an chak zawh loh tum hian United manager Erik ten Hag a chetha tawk lo. Hun tawp dawn hnaih lamah Raphael Varane lachhuakin Harry Maguire a luhtir a, Maguire hi Sevilla goal hnihna thunsak tu a ni. Hei bakah hian player panga thlak a, inthlak theih chin a hman zawh hnuin defender pawimawh Lisandro Martinez a inhliam leh ta bawk nen player 10-in an khelh tluan a ngai. Tlem zawk an ni hi an inhnehtawk nana kawngru su em em, Sevilla fuih phurhtu pawimawh tak a ni zui bawk.
Result dang
Europa League quarter-final inkhel dangah Italian Serie A club lian Juventus in hnehna an chan laiin AS Roma chu Feyenoord Rotterdam hneh lovin an tlawm ve thung.
Juventus hian Allianz Stadium-a an mikhual Sporting Lisbon chu minute 73-naa Frederico Gatti goal thun hmangin an hneh a, pen khatin semi-final an hnaih. Portugal-a inkhel hmachhawn leh tur an nih vangin Juventus dinhmun a tha hluai chuang thung.
Jose Mourinho enkawl AS Roma chuan De Kuip, Rotterdam-ah Feyenoord Rotterdam an hmachhawn a. Mualneitu tan minute Mats Wieffer goal thun hmangin tlawm zawkah an tang. Roma hi an muala inlan zui leh tur an nih vangin inlehthalna thlentir ngei tura beisei an ni. Ninga zana inkhel dangah Bayer Leverkusen leh Union St.-Gilloise chu si khat ve ve inpein an inhnehtawk ve thung.