Anfield-ah Manchester United

Zanin dar 6:00 atang in English Premier Lea-gue khelh chhunzawm a ni leh dawn a. Zanin hian inkhel pasarih a awm dawn. Zanina inlan tur zingah hmahruaitu Arsenal leh champion lai Manchester City te an tel. Kar tawpa EPL inkhel tur zingah Anfield-ah Manchester United an lenglut a, Liverpool an hma-chhawn tur hi a ni ang. An hmelma lian United lakah Reds in hnehna an chang a nih chuan top 4 huang an hnaih leh zual dawn a. Champion beiseina sang zawk nei thei turin Red Devils in Anfield-ah an chak an mamawh viau dawn bawk.
Liverpool leh Manchester United te hi English club ropui fal pahnih an ni a, chungnun inchuh reng renga hmanhlel an ni. Liverpool hian hming lemah ‘Reds’ an hmang a. Manchester United in an hming lemah ‘Red Devils’ an hmang leh hmak bawk. An nickname atang ngawt pawh hian team ingeih tak chu an ni lo tih a lang thei nghal ruak. Anni pahnih inkhel hi eng level-ah pawh ni se a nep ngai lova, an boruak a tang at reng thin. Inelnaah champion lo ve ve pawh nise an pahnih inkara chungnung zawk an nih chuan tu tan ve ve pawh champion tlukna lawmawm a ni tho tho an ti hial thin.
Season kal mekah Liverpool hian beisei an phak lova, inelna hrang hrangah an chetha lo. EPL-ah vawi 24 khelin point 39 an hmu a, paruknaah an awm mek. Nilai zan khan Anfield-a an mikhual Wolves chu si hnih faiin an lo hneh a, point thum nen hma lam an pan. Pathianni zanah Anfield-ah ngei an inlan zui leh nghal dawn a. Hnehna chang zawn turin inrintawkna sang tak an nei ngei ang.
Manchester United hian Europa League atangin Barcelona an hnawtchhuak a. Carabao Cup-ah An champion hnuin FA Cup quarter-final an lut leh tawh bawk a. Tunhnaiah an chetha tluang viau a, tun hi an tan Anfield-ah lenglut a, an hmelma lian ber hmachhawnna hun tha a nih ngei a rinawm. Erik ten Hag hnuaiah trophy an lak tawh vangin Red Devils hian inrintawkna sang zawk an nei ngei dawn a, manager leh player laka pressure sang lutuk pawh a ziaawm phah viau thei bawk.
Anfield-a lenglut tur Manchester United hian EPL-ah vawi 24 khelin point 49 an hmu a, pathumna ah an awm mek. Hmahruaitu Arsenal nen an inkarah point 11 a tla zep mek a, Gunners aiin vawi khatin an khel tlem zawk thung. Point 11 zetin hmahruaitu Arsenal lakah hnufual zawk mek mahse khelh hmabak ala tam am vawi 14 zet khelh tur an la neih vangin United tan EPL-ah champion theih ala ni chiang mai. Champion thei an la ni tih hi an mahni ngei hian an hrechiang viau a, champion tura an mamawh chu game tina khelh that a ni a. Chumi ti tur chuan an inbuatsaih ngawrh viau ngei ang.
Liverpool hian player hliam thar lam an nei lova, hliam vanga chawl deuh reng Thiago Alcantara, Joe Gomez leh Luis Diaz te an chhawr thei dawn hnai a, chawn hliam vanga chawl Nabi Keita pawh a infit chho leh ta viau bawk. Hetihlai hian United erawh chuan Liverpool hmachhawn hunah an defender pawimawh Luke Shaw an chhawr thei dawn lo thung. Shaw hian FA Cup-a West Ham an hmachhawn tum khan hliam a tuar a, a chawlh rih a ngai dawn. Reds lakah hian Jadon Sancho a inlan thei dawn em tih a chiang lo bawk.
Liverpool leh Manchester United te hi inelna hrang hrangah vawi 238 zet an inhmachhawn tawh a, vawi 90 chak tawh United chungnung zawkah an tang mek a. Liverpool hian an hmelma United lakah vawi 80 hnehna an chang ve tawh bawk a, vawi 68 dang chu an inhnehtawk ve thung.
Erik ten Hag an rawih hmain United hi an hmelma lian Liverpool lakah vawi thum ngawt an tlawm zawn hman a. An khelh hnuhnung pahnihah 4-0 leh 5-0 ngawta an ngam loh lakah Erik ten Hag hian hnehna a rawn chanpui nawlh a. An intum hnuhnung ber August 22, 2022 khan United hin 2-1 in Old Trafford-a an mikhual Liverpool an hneh.
Tarlan tawh angin Manchester United hi inelna hrang hranga an khelh that lai a ni a. World Cup hnu lama forward chetha ber Marcus Rashford an neih miau vangin Anfield-ah an chak a nih pawhin chak awm renga ngaih an ni ang. Reds lakah Rashford-a’n goal a thun a nih chuan ‘kha pa bawk kha’ an ti leh ngei ang.
Sadio Mane an chhuahtir hnuin Liverpool hian goal thun an harsat ta tlat a. EPL season kal meka vawi 24 an khelh tawhah goal 40 chiah an thun a, goal 28 zet an chhuah tawh thung. Inkhel pawimawh takah hnehna chang turin goal thun an harsat zui leh dawn nge, United lakah an harsatna sukiangin ‘Liverpool nge nge’ kan ti leh zawk dawn. Pathianni zan, zan 10:00 i nghak thleng phawt ang u.