Anti-drone system-in Taj Mahal veng dawn

Anti-drone system-in Taj Mahal veng dawn
India ram mai ni lo, khawvel huap pawha hmun pawimawh leh mi tlawh tam, Taj Mahal chu van sang atanga beihna leh tihchhiat theihna laka a him theih nan tun lai thiamna changkanga thuam anti-drone system hmanga vil a ni dawn tih Pathianni khan sorkar hotu lianin a sawi.
He thlan in hi Central Industrial Security Force (CISF) leh Uttar Pradesh Police-in an ven mek a ni a, tun lai thiamna tha zawk hmanga beihna pawh an lo danchah zung zung theih nan venhimna thuah thar pek a ni thuai dawn a ni.
Pahalgam-a tun hnaia India-in beihna na tak a tawh hnu leh a chhan let nana May 7-a Operation Sindoor tia hming vuaha Pakistan leh Pakistan luah Kashmir-a mi firfiakte hmun kua beih a nih hnuah Taj Mahal venhimna thar tur ruahman hi puan a ni.
Pakistan hian laipui, missile leh drone hmanga beihna a hmang uar hle a. Van sanga indona hi Indian sipaite chuan a lo dang thei deuh zel a; mahse, hmun pawimawh bikte chu drone laka him thei tura ven chu a ngai pawimawh thar a ni.
Assistant Commissioner of Police (Taj Security) Syed Arib Ahmad chuan, “Anti-drone system chu Taj Mahal complex-ah dah a ni dawn a. System hian km 7-8 vel a tuam dawn a, a dome pui ber atanga metre 200 vela mi a dangchat thei dawn a ni,” a ti.
“System hian amahin drone lo lutte chu a signal a lo tibuai thei dawn a, chu chuan a tih tum a tihtir thei dawn lo a ni,” a ti bawk.
Ahmad-a chuan he system thunun thei tur hian police pawh zirtirna pek an ni tawh a, a buaipuitu tur bik team pawh din a ni tawh tih a sawi bawk.
“Team hian drone thlawh chhuah tantirna hmun an chhui zui ang a, a tlakna hmun pawh an en zui nghal dawn a ni,” a ti a. System thar bun tur hi ni rei lo te chhunga zawh fel hman an inbeisei tih a sawi bawk.
UNESCO World Heritage Site zinga mi, Taj Mahal hi India-a hmun tlawh hlawh ber pakhat a ni a, ram chhinchhiahna pakhat a ni bawk a, a himna hi sorkar pawhin a ngai pawimawh hle a ni.