April-ah hri vei 82
Tun hnaiah Mizoramah Covid-19 a hluar leh a, thla liam ta April-ah khan mi 82-in an vei tih hriatchhuah a ni.
IDSP te’n an chhinchhiah danin April ni 12-ah khan mi pahnihin an vei tih hriatchhuah a ni a, chumi hnuah chuan thla tluanin endik a awm apiangin hri vei an awm ziah. Ni 14, ni 23 leh ni 30-ahte endik a awm lo a, ni dang zawngah chuan hri vei hriat thar an awm.
April thla chhung khan sample 342 endik a ni a, an zingah hri vei 82 an awm. Endik zinga 23.98% te’n hri an kai a, vanneihthlak takin nunna chan an awm lo.
Thu dawn danin, April thlaa hri vei hriatchhuahte hi tun hnaia state pawna zin chhuak lo an ni deuh zel a, an kaina pawh hriat loh, hri vei nen an intawk/insi em tih pawh hriat loh an ni zel.
‘Kai tharte hi an kaina a hriat theih tak tak loh a, positive contact a awm em tih pawh a hriat hleih theih loh. Anmahni mi dang an tawk zui em tih thlengin, a chhui theih tak tak tawh loh,’ official pakhat chuan a ti.
May ni 1 thleng khan Mizoramah sample 19,93,904 endik a ni tawh a, chung zinga 2,39,052 te’n hri an vei a, mi 726-in nunna an chan. May ni 1-ah khan enkawl mek mi 49 an awm.
April-ah hri vei 82
Get real time updates directly on you device, subscribe now.