Nikum aiin ruah a tam rih Nikum aiin khua a lum rih

Nikum aiin ruah a tam rih
Nikum aiin khua a lum rih
Kumin thla li chhung leh nikum thla li chhung khaikhinin kuminah ruah tui a tam zawk; kuminah ruah tui a tlem emaw tih mai a awl a, mahse a lo tlem lo.
Kuminah, a bikin April-ah khua a ro a, lum pawh a lum. Ruah tui a tlem hmel a, mahse State Meteorological Centre-in an chhinchhiah dan chuan, nikum khan April thlengin ruah tui hi mm 167.6 a tla a, kuminah April thlengin mm 176.1 a tla.
State Meteorological Centre enkawltute chuan nikum khan ruah tui hi pangngai takin a tla a, kuminah erawh a sur chhunah tam tham deuhvin a tla a, a reh leh vang vang a, hei vang hian ruah tui a tlem hmel ta tiin an sawifiah.
Nikum khan ruah hi thla tin a sur a, ruah tui hmasa ber pawh January-ah a tla. Kuminah chuan January leh February-ah ruah a sur lo tluan a, March ni 15-ah ruah tui hmasa ber a tla chauh. Chumi hnuah pawh khua a ro a, April-ah pawh ruah a sur zing lo. Mahse a sur changin tam tham tak a sur thin thung. April ni 22, 23 leh 24 velah phei chuan ruah a tam.
Nikum khan April-ah ruah tui hi mm 73.2 a tla a, kuminah chuan mm 98.1 a tling. March-ah pawh nikum mm 53.3 a tla a, kuminah March-ah mm 78 a tla.
Mizoram sik leh sa vawngtu pawimawh chu ruah a ni an ti thin a, khaw lum vanglai pawhin ruah a tlak chuan a daih nghal huai thin. Kuminah April thlenga chhutin nikum aiin ruah a tam zawk chungin kuminah khua a lum zawk.
Nikum khan lum leh vawt tehnaah a san ber laiin 32 degree Celsius a ni a, nikum April ni 28 leh ni 29-ah khan 32 degree Celsius niin, kuminah chuan April ni 16, ni 18 leh ni 20-ahte khan 33 degree Celsius a kai.
State Meteorological Centre hotute chuan hei hi ruah a sur ngun loh vang a nih thu an sawi a, ruah sur loh laia a lum vang a nih thu an sawi.
Nikumah chuan kum tluanin ruah tui hi a tla a, kuminah chuan a tam laiin a tla tlawrh a, a reh leh vang vang a, ruah a sur mumal rih lo tihna zawk a ni an ti.