Bangladesh-ah Islamist-ten hmeichhe inkhelh phal lo

Bangladesh-ah Islamist-ten hmeichhe inkhelh phal lo
Bangladesh-a hmeichhe football khelh tur chu an khelhna tur hmuna sakhaw thil zirna ina zirlaiten hmeichhiain football an khel tur duh lohna nasa taka lantirna khelmual an tihchhiat avangin thulh a ni a, hetiang hi tun hnaia a thlen vawi hnihna a ni.
An ram hmarthlang lama Joypurhat khawpuiah inkhel hi Nilainia awm tura ruahman a ni a, an district hmeichhe team leh an bul lawk, Rangpur hmeichhe team inkhel tur an ni a; mahse, a hmun leh bungrua eng emaw zat suasam a ni tih a huaihawttute chuan an sawi.
“Kan bul lawka field-ah Islamist-te pung khawmin kan khelhna tur panin kawng an zawh a, za tel an ni,” tiin tournament huaihawttu, Samiul Hasan Emon chuan AFP news agency a hrilh.
“Thil awm dan chu a tha zawng aia a duhawm loh zawnga a kal zel tak avangin inkhelh pawh kan thulh ta a ni,” a ti.
Tual chhunga sakhaw thil zirna sikul headmaster Abu Bakkar Siddique chuang lungawi lohna lantirnaah hian zirlaite bakah zirtirtirtute pawh an tel tih a sawi a, an sikul chauh lo, sakhaw thil zirna in danga mite pawh an tel ve tih a sawi bawk.
“Hmeichhiain football an khel hi a Islamic lo a ni,” a ti a. “Hei hi kan sakhuain ti tura min tih, kan rinna dodal zawnga chete kan danna tur a ni,” a ti.
Thawhlehni maiah pawh khan Joypurhat bul lawk, Dinajpur-ah pawh hetiang thil hi a lo thleng tawh a, hmeichhe football khel tur chu nasa taka dodal niin a duh lotute hi thira siam tiang nen an thawk chhuak a, thulh phah a ni.
“Inkhel hi khelh tan hma darkar khat leh a chanve-ah thulh a ni a. Hmeichhiate pawh hmun himah rang takin kan hruai nghal,” tin zirtirtu, Moniruzzaman Zia chuan AFP a hrilh.
Tual chhunga sorkar hotu pakhat, Amit Roy chuan inkhelh duh lotu leh a duhtute leirawhchana an invawmnaah mi paliin hliam an tuar a, an na lem lo va, damdawi in awm ngai khawp an awm lo tih a sawi.
Nilainia thil thleng hi Bangladesh Football Federation (BFF) chuan a dem thu a sawi.