By Zoremi Hmar Zote
-- Advertisement --
Ka phone a rawn ri ral ral a, Dr.PC Biaksiama a lo ni a. A lehkhabu ziah, release thar diai chu min pek ve a duh thu a rawn sawi a, keia lawm pheng chuan naktukah ka rawn lam ang ka lo ti var a, chu chu kar kal ta Zirtawpni kha a ni. Ka fapa nen kan va lam ta vang vang a, ka chhiar châk tawh bawk a, in kan thlen leh veleh ka chhiar nghal ta char char a. ‘Dah mai harsa, chhiar laklawh awm’ kan tih ang chi kha niin, a bu chhung thu tlangpui ka han share ve dawn cheu a ni.
Khawvela hnam sang tam tak zinga a hnam anga huat rawn hlawh ber leh tihduhdah tuar nasa ber chu Pathian hnam thlan Juda hnam an nih thuin bul a tan a. Juda huatna (Anti Semitism) awmzia leh Judate huatna tobul te chhuiin, Pathian thu kal sualpuina avanga Kristian ten kum sangkhat zanga chhung zet Pathian hnam thlan Juda mipui chunga tihduhdahna rapthlak an kalpui dan, Pathian hnam thlan an nih vanga Setana’n Judate tihboral vek a tum avanga kohhran hruaitute hnena zirtirna dik lo a hmantir dan leh a bum dan te kan hmu a.
Martin Luther-a kha Juda sakhaw hawtu a lo ni ve reng em, Nazi ho leh Luther-a kha an lo inthian tha réng em ni, a kohhran ten engtin nge an ngaih tih te, eng vangin nge Juda ten Isua an pawm ve theih loh tih te he lehkhabu-ah hian ziah a ni; Tin, ‘Hitler-a kha Juda thisen kâi an ti elo maw…a lo ni tak tak réng em ni’ tih te, German ho khan Juda eng zat chiah nge an tihhlum, an tihhlum mai tur lo humhimtu leh Judate thawnthu ngaihnawm te, insuat dan rapthlak leh insuat mangna ‘Extermination camp’ chanchin lungchhiatthlak tak mai te, Israel ram lo pian thar leh dan, Bible-in a hrilhlâwkna thleng dik vek mai chanchin leh ‘zionism’ chu eng nge tih te chhiar tur a awm bawk. Indopui 1na a lo chhuah a, khatih laia khawvel sawrkar ropui ber, Great Britain-in hnehna a chan chhan kha Juda pa vang a lo nih reng mai dan te ngaihnawm takin a ziak a.
Palestina hi tu ram nge, Israel te ta nge Arab ho ta? tih thu, neitu nih an inchuhna thu buai chingchivet zet, ngaihnawm si pawh ziah a ni a, Israel ram hi Pathianin kumkhua atana a pêk ram a nihzia Bible behchhana chhui zauna thu leh, eng vanga Arab-Palestinian te hian chuh ve ngawt nge an nih, eng nge an tanhmun ni ve ta tih te, eng vanga Arab firfiaka che pawl, Hamas leh Hesbolla te hian Juda te reng reng nuai chimih vek tum nge an nih tih leh, khawvela ram buai ber helai Palestinian leh Israel te inkar chanchin te, an ram inchuh-ah hian tunge thiam zawk a, tunge thiam lo zawk, eng tia chin fel tur chi nge tih te chhuiin, Palestinian state awm ve theih loh chhan pawh fiah taka ziah a ni.
Eng vangin nge Muslim te hi an sakhaw tana ral do tura an inpek viau mai le! Thih pawh pawisa lo, lu chhum ban chhum huama an martar duh tlatna chhan te, hlauh chu sawi loh, a châka an châk zawk chhan, chhan tha té an neih dan te, an lawmman dawn tur, an lehkhabu thianghlim Quran-a inziak avanga martar ngei an tum hial zawk dan te fiah taka ziah a ni a, a ngaihnawm rem rem hle. Bung 13-ah hian Kristian ten Israel kan tan chhan tur, kan support chhan tur te bible behchhana fiah taka ziah niin, thupui hrang hrang pasarih-ah a then a.
Israel leh Aiqupta indo thu te hi ngaihnawm rep rep tak a ni! Aiqupta sipai hotu leh a hnu kum 1952-a president lo ni ta, Abdel Gamal Nasser-a, inhrosa kúk kûk mai leh vaupung tina zet, a sipaite chuti leh lua si lo, an pheikhawk phelh meuha Kêl ruah hlau tlan taka an tlanchhiat dâwr dáwr thu te hi ngaihnawm a tling a, Bung 15-na a ‘ni ruk indona’ tih-a Arab tangrual pawl ten an cho chhuah liau liau indonaa Pathianin Israel te finna-a a thuamzia te, boruak lama indonaa hmelma sipai an chêt ve hman loh thu leh, tahna bang la let leh tura an beih dan te hi a ngaihnawm mai piah lamah Pathian ropuizia a lang chiang hle.
Aigupta nena inkhuainuai: Tank indona hmun pui ber, indopui 2-na laia Kursk hmuna German leh Russia indo hnua ‘Tank battle’ ropui bera sawi hat tham chu Israel leh Aiqupta indonaah a thleng a, darkar hnih chhung leka Israel Tank-in Aiqupta Tank rual a suasam dan pawh hi pui tak a ni; Aiqupta sipai tlanchhia, Israel ten Suez Canal thlenga an ûm thlâk dan te hi Israel tan vanga thaw dèp dép-a chhiartu tan chuan thâwk huaina tham a tling a ni. “America atangin ralthuam a maka maka tam a lo thleng zut zut a, chung zinga indona hmuna attack helicopter han che vel chuan Aiqupta air Defence chu a chawk buai hneh hle a…” tih te, “Aiqupta sipai tha hlâwm mi 20,000 lai, ‘Egypt Third Army’ chu hma lam pan thei lovin an awm a, an rawn kirthlâk dawn chuan Israel sipaiin an lo dang chat tawh bawk si a, tichuan Sinai thlalerah supply dawng thei tawh lovin an rêp châr der mai a ni,” tih te a ni nawk mai.
Bung 17-ah hian ‘Israel te chunga thil mak thleng te’ tih dah a ni a, Pathianin Israel te a humzia leh indona hrang hranga hnehna an chan dan mak tak tak, mihring tih rual loh thil mak thleng te a ziak diat diat a, ngaihnawm tak a ni; ni ruk indo laia Old Jerusalem awptu chu Jordan sawrkar a ni a, chu Old Jerusalem an lâk lêt dan, silai vawi khat pawh hmet puak lova an lâk lêt leh dan te hi mak si, tak si a ni. Syria Tank rual 150 lai mai. Israel Tank 3 lekin an han hmachhawn ta teh reng a(h)! Chu a chhapah a mu an hmang zo tawh lehnghal; tlanchhe lo tura thu pêk an dawng bawk si, syria tank ten an duhtawka an nghaisak turin an lo nghak tawp tawh mai a, mahse thil mak a thleng ta, Israel sipaite chu an him pial, a chhan i hriat duh chuan he lehkhabu hi lei mai rawh!
Bung 18-ah hian Israel leh Aigupta inrem thu kan hmu a, chutih rualin bung 19 thu-ah chuan ‘Israel te mut mawh, hnar mawh siamtute’ tiin Palestinian firfiak pawl hrang hrang leh buaina an siam dan chanchin kan hmu thung. Bung 20-ah chuan ‘Israel hausakna’ tih ziah niin, an hlawhtlinna bul te, Israel Economy hlawhtlinna thurûk pasarih ziah a ni bawk. Israel leh America inzawmna, eng vangin nge USA hian Israel a thlawp tlat? A chhanna chu he lehkhabu-ah hian a awm e; hei mai bakah hian ‘Israel rama pem luh dan a awm em’ tih te, ‘Israel rama Mizo pem thlate khu chhandam an ni ve tho em’ tih zawhna te, ‘Mizote hian Pathian thu atangin Israel nih theih dan kan nei em’ tih leh zawhna hrang hrang, pawimawh tak tak leh a chhânna a la awm cheu bawk. Khing kan sawi tak bakah hian thu ngaihnawm leh hlu tak tak ziah a ni a, heta sawi zawh vek sên lah ni hek lo le; hre ve chak chuan lei mai tur a ni ang. Bu khat Rs 300 man niin, lehkhabu dawr hrang hrangah leh Synod book room, Baptist book room-ah te lei tur a awm e.