Hnam Rohlu: Kuthnathawktute

Tun kar tir lama ‘Horticulture Fair’ hawngtu Deputy Chief Minister Pu Tawnluia chuan kuthnathawktute chu ‘hnam rohlu’ an ni tiin an thawhrimna fakawm a tih thu a sawi a; Mizoram hmasawnna sulsutu pawimawh tak an ni tih inhre reng turin a chah bawk a.
Ram hruaitute hian kuthnathawktute hi ‘hnam rohlu’ tiin an sawi teh chawk a, an hlutna phawk chhuak zo tur hian kuthnathawktute dinhmun hi kan ngaipawimawh tawk zo leh si lo em aw a tih theih awm e. A chhan pawh, tun thlenga state sum thawh chhuah (GSDP)-a an contribution a la san theih loh dan atang te leh, inthlanpui apianga kuthnathawktute chawikan ngai em em anga sawi theih a la nih ziah atang te hian a hriat mai awm e.
Ram hruaitute hian kuthnathawk-tute hi an hlamchhiah kan ti lo; mahse, thua an ngaih pawimawhna leh, a taka kuthnathawktute dawmkanna kawnga hmalakna hi a inbuktawk ta lo thin a ni ber a. Hei hi ram hruaitute hian an tlin loh vang te, an ngaihthah hrim hrim vang te, an thiamnain a tlin loh vangte a ni em em bik lo ang a, state pachhe tak, ba ngah tak kan nih thinna hian hmalakna tur a tithuanawp ve bawk ang tih erawh a rin theih bawk awm e.
Kum 80 chuang kaltaah khan, Mizo tlangval Kaphleia chuan kuthnathawktute pawimawhzia a lo hmuchiang tawh hle a. “An pawimawhzia hi a nasa a, khawpui chawmtu an ni a, an tel lo chuan khawpui mite hi riltama thi zo mai tur an ni; dik takin khawvel chawmtu an ni” tiin thahnemngai takin kuthnathawktute dinhmun pawimawhzia leh an tel lova khawvel a kal theih lohzia a lo sawi tawh a ni.
Miin ro hlu tak a neih chuan uluk takin a enkawl thin. Kan Hnam Rohlu ‘kuthnathawktute’ dinhmun kan dah dan leh kan enkawl dan hi kan ngaihtuah chian a ngai ta hle; rohlu enkawlin kan enkawl em tih hi inzawh kan mamawh awm e. Kuthnathawktute dinhmun dawmkan hi ram economy dawmkanna a ni nghal tihah hian kan la chiang thei meuh lo a nih a rinawm a, potential kan neih that tehreng nen hian.