Arab lamah Serie A top scorer Retegui a pem daih!

Arab lamah Serie A top scorer Retegui a pem daih!
Season liamta maia khawvel league thja zual pangate zinga lang pha Italian Serie A meuha top scorer la ni phate hi chu season thara chhe thut thei an la ni lo hrim hrim a, club football level sang bera la tal zui tura beisei an nih laiin Atalanta striker Mateo Retegui chuan sum tamna Saudi Arabia a pan ve ta!
Kum 26 mi, vanglai hmang chho mek Retegui hi Saudi Pro League club Al-Qadsiah chuan pound maktaduai 56 chuanga an leichhuah hnuin kum li daih contract an ziahpui nghal a; Atalanta a chhuahsanna man hian kum 2023-a AC Milan atanga Newcastle United-in Sandro Tonali an leina man (£55m) kha a khum tak avangin Retegui hi Italian player piang chhuak tawh zawng zawng zinga man to ber a ni ta daih!
Argentina rama piang ni mah se Retegui khan Italy tana khelh a thlang ta zawk a; club football lamah pawh Serie A hi a chet velna niin, nikum nipui thawt lai khan Genoa atangin Atalanta a zawm a, season liamta khan league game 36-ah goal 25 thunin Italian top flight-a goal khung hnem ber niin, a team chhuahsan tak kha league-ah pathumna a nihpui nghe nghe.
Argentina aia a thlan tak Italy tan kum 2023 khan a khel tan a, a bultanna pawh England laka 1-2-a an tlawm tum kha niin, tun thleng hian ram tan game 20-ah goal ruk a thun tling ve tawh.
Chuti ang mi chu Atalanta-in sum tam tham zet lakluh phahna hmanrua atan an hmang a, thlahna thuchhuah an siamah a chhuahsan tak club chuan an player hlui hmalam hun atan duhsakna an hlan.
A club thar Al-Qadsiah hi season liamta khan Saudi Pro League-ah palina an ni a, season tharah eng dinhmun tak thlenpui ang maw?
Retegui hian Arsenal, Barcelona leh Chelsea striker hlui Pierre-Emerick Aubameyang kha Saudi Arabian club-ah hian a thlak dawn a; kum 36 mi lai ni ve tawh Gabon international khan karliamta mai khan Al-Qadsiah a chhuahsan ve chiah a, French Ligue 1 club Marseille nen sawizawm mek a ni.