Arab ram hruaitu ten inkahhai puang turin US nawr
Egypt leh Jordan te chuan Inrinni kalta khan US Secretary of State Antony Blinken hnen ah a rang thei ang bera Gaza hmuna indona thleng mekah Israel hnena inkahhai puang tura nawr vat turin an ngen. Israel te hian bomb hmangin Gaza hi an bei renga UN enkawl school leh raltlan te awm khawmna hmun chu bomb-in deng fuhin mi 66 laiin nunna an chan belh leh a ni. Blinken chuan press conference neiin Egypt leh Jordan External Ministers ten an tawiawm a, Israel te sawi dan sawi chhawngin Blinken chuan helai indona kal lai meka inkahhai puan awmzia chu Hamas, Palestinian hel pawlten Gaza an thunun thin chu a hma ang bawka khawsa leh thei turin kan siam tihna a ni, tiin.
UN leh khawvela ram thil tithei hruaitute chuan October 7 atanga indona chhuak tawh Israel-Hamas te inbeihna kal mekah remna siam dan tur zawngin inlungrualna an nei tawh a. Hamas te hian boruak, lei leh tuipui atangte in Israel hi an kap a mi 1,400 laiin nunna an chan a, mi 240 lai an hreng bet a ni. Israe hian Hamas te chet dan chu nasa taka chhangletin boruak lam atangin Gaza chu a bei a, Gaza chu tlawhpawh theih lohin a dangchat hmiah a, hemi velah lei atanga a beihna chu ti nasa zual sauhin Palestinian mipui bit em ema an chenna chu a bei ta a ni. Tun dinhmunah hian mi 9,500 velin nunna chan tawh angin an chhut a ni.
Hetih mek lai hian Inrinni kalta khan Palestinian tantu mi sang tamtak te chuan Washington DC-ah kawng zawhna neiin Biden-a sorkarin Israel a thlawpna chu duhlo in an dodal mai bakah Israel-in Gaza Strip-a sipai tha chakna a hmang reng chu an dem hle bawk a ni. ‘Luite atangin tuipui ah, Palestine te chu an zalen ang’ ti a aurual in leh chalhrenna dum leh var te hreng chungin Palestinian Flag leh posters te keng chungin White House an pana, hengho zinga a tam ber chu thalai la naupang tak tak te an ni. Lungawilohna lantirtute kawngzawh hian White House an thlenin Gaza-a thisen chhuahna entirnan White House hmar thlang lam gate-ah rawng senin an inkap a ni. Heng lungawilohna lantirtu pungkhawm te hian “Juda te ram din kan duh lo, 48 kan duh” tiin an au rual a, 48 hi 1948-a Arab leh Israel Indona hunlai sawi lan nan an hmang a ni. Indona-a thi naupangte pualin an bag te chu kawngpuiah an dah tlar a, lungawilohna lantirtu pungkhawm te chuan an hming sign-in a rang thei ang bera inkahhai puang turin an nawr a ni. Heng lungawilohna lantirtu pungkhawmte hi a tlem berah mi 10,000 lai niin Lafayette Park bula General Marquis de Lafayette lim bulah an khat veka thuziak chi hrang hrang leh Palestinian Flags te an keng a ni. Pungkhawm te hian President Joe Biden chu tualthahna tanpuituah an puh a, Israel a puihna chu titawp vat turin an chah a ni.