Arab ramten Qatar an thlawp karah Israel-in Hamas hruaitute a vau

Arab ramten Qatar an thlawp karah
Israel-in Hamas hruaitute a vau
Arab leh Islam ramten Israel-in kar hmasaa Qatar a kah avanga intawhkhawm an huaihawi mek laiin Israeli Prime Minister Benjamin Netanyahu-a chuan Hamas hruaitute chu ‘khawi hmun pawh ni se’ an kap ze; lo vang tih a sawi thei lo.
September 9 khan Israel hian Palestinian hel pawl hruaitute chu Doha-ah kapin hei hian Hamas-in October 7, 2023-a an beih avanga Gaza indona awm mekah boruak thar a siam mek.
Arab leh Muslim ram hruaituten Qatar lam an tang tih an tihlan mek laiin US Secretary of State Marco Rubio-a chuan Thawhtanni khan Netanyahu-a hmuin Israel a thlawp tlat thu leh Washington pawhin Qatar kahna chu a pawmzam thu a sawi.
Israel-a Netanyahu-a bula dinga thu a sawinaah Gaza indona tihtawpna awm chhun chu Hamas fighter-ten an mi hrente an chhuah veka an inpek a nih thu a sawi a. US-in a duh dan ber erawh indawra indo tihtawp a ni tih a sawi bawk.
Washington hian Israel-in Middle East-a sipai hmun lian ber an neihna, Qatar an beih tur hi an hre lawk lo tih a lo sawi tawh a. President Donald Trump-a chuan Pathianni khan Israel hi ‘a fimkhur tak zet’ tih a sawi.
“Hamas laka an chetna a ni a, Qatar hi US thawhpui tha tak la ni reng,” a ti.
Hamas chuan Israeli-ten Qatar an kahnaah khan an mi panga an thi a, heng zingah hian Gaza-a an chief fapa tlanchhe mek tih sawiin an hotu hi a him thung niin an sawi a. Qatar chuan an security agent pakhat a thi tel tih an sawi.
Qatari Emir Sheikh Tamim bin Hamad Al-Thani-a chuan Arab ram hruaitute hmaah ‘dawihzep leh mawlmang taka Israel-in a kahna chu ‘a tak leh thutlukna fing’ hmanga chhan let a tul thu a sawi a. Israel-in a kahte chu US-in inkahhai a awm theih nana rawtna a neih zir chiangtu Hamas hruaitute an nih thu a sawi.
Arab ram intawh khawmah hian Iran, Turkey leh Saudi Arabia te pawh an tel a, eng ang thu nge an tihtluk erawh hriat a la ni chiah lo.
Hamas thlawptu, Iranian President Masoud Pezeshkian-a chuan ‘eng Arab ram mah Israel beihna lakah hian a him lo va, inpumkhat bak duhthlan tur kan nei lo’ tiin a sawi a. Anni hi June thla khan Israel nen ni 12 an lo indo tawh a ni.
Israel nena kum 1979-a inremna lo siam tawh, US nen pawha inthian tha, Egyptian President Abdel Fattah al-Sisi chuan Israel chet dan chu ‘inremna a awm theihna remchang daltu’ a nih thu a sawi.
Rubio-a chuan Israel a tlawh zawhah Qatar hi a tlawh zui dawn a. Gaza buainaah inrawlha mi hren 48 an chhuah vek theih nan te, Hamas-ten ralthuam an tun theih nan leh Gazan-te hma lam hun atana hma la zel turin a ti.
Hetih lai hian Netanyahu-a chuan Washington pawhin indawrnaa inchin fel chu a harsa tawh dawn niah ngaiin Israel-in ruahmanna thar neia sipai chakna hmanga Hamas chhut chimih chu a awn zawk niin a sawi.
Rubio-a nena an din dun laiin Netanyahu-a chuan Israeli-ten West Bank an awp zui chu a thleng lo ang tih a sawi lo va, he hmun hi ram tam takin Palestinian ram atana puan turin tun thla tawpa UN General Assembly-ah thlen an tum a. A tum zingah France leh Britain pawh an tel.
Gaza-a indo mekna hi Hamas-ten Israel beia mi 1,200 chuang an thah leh hren tura mi 251 an hruaiin a hrin chhuah niin mi 64,000 chuang an thi tawh.