Inflation sang zel dan nan Argentina chuan 2,000 peso banknote a pechhuak dawn tiin Argentina central bank (BCRA) chuan a puang a.
He note thar hi $11 nena inhen tur niin nikum December thla thlenga thla 12 chhunga consumer price 95% dawn laia a san avanga siam chhuah a ni a. Argentina hian kum 1991 hnua inflation sang ber a tawng mek a ni.
-- Advertisement --
Tuna Argentina-a note sang ber chu 1,000 peso niin $ 2.70 nen a hlutna a inhen a ni. BCRA te chuan note thar chuan ‘Argentina a science leh medicine lama hmasawnna a lantir ang’ an ti bawk.
Note-ah hian pioneering doctor Cecilia Groerson leh Ramon Carrillo te thlak tarlan a ni dawn a, eng hunah nge note thar hi hman theiha pek chhuah a nih dawn hriat a la ni lo thung.
Tuna Argentina currency hi kum 1992 a tihchhuah leh kalpui kha niin US dollar khat nena hlutna inhena siam a ni a. Mahse, fixed exchange rate system chu kum 2001 leh 2002 a financial crisis a tawn khan hman chhunzawm a ni lo thung.
Khami hnu atang khan peso chuan a hlutna nasa taka hlihin local artist pakhat phei chuan banknote-ah lem a ziak a, a chhan chu canvas man aia a tlawm zawk vang a ni a.
Sergio Diaz, of Salta chuan Steven Spielberg a movie siam Jaw behchhanin Argentina a inflation sang zel chu painting hmangin a pholang a ni.
Argentina-ah hian tun hnaiah thil man a sang hle a, commodity hrang hrangte a man a sangin energy man te pawh a sang far far hle a ni. Thil man san chhan hi chhan hrang hrang vang niin central bank-in pawisa a print tam vang te bakh Ukraine indona nghawng te pawh a ni tel bawk.
Nikum December thla khan International Monetary Fund (IMF) te chuan South America-a economy lian ber pahnihna bailout nan hian $ 6 billion pek a lo remti tawh a ni.
Nikum khan Argentina economy buai tak ram hian kar li chhung lekin economy minister pathum lai a nei hman bawk a. Nikum September thla khan central bank chuan interest rate chu 75% in a tipung, hei hi cost of living sang zual lutuk tur dan nana a ruahmnan a ni.
Tunkar tir lam khan Brazil leh Argentina te chuan common currency ram pahnih tena insumdawntawn nana an hman theih tur neih an remti dun bawk a. Ram pahnih hruaitute chuan US dollar-a innghat lova sumdawn tawn dan an ngaihtuah a ngai an ti bawk a, sawihona kalpui mek a ni bawk.