Argentina in Curacao an sawp

World Champion Argentina chuan Nilaini zing khan Santiago del Estero khelmualah Curacao an hmachhawn a, si sarih fai ngawtin Argentina hian hnehna an chang. Cura-cao an sawp tum hian Lionel Messi chuan hat-trick a siam a, ram tan goal 100 a thun tling ve ta chiah.
Argentina hian an mikhual Curacao lakah bul an tan tha a, hlauh-awm an siam nghal mawlh mawlh. World Cup-ah beisei phak lo Lautaro Martinez van-duai a kaltluang a, Inter Milan forward hian goal thun theihna hun tha lutuk tak mai a hlah leh ringawt. Messi pawhin a hun tha a chhawr tangkai thei bik mai lo. An hun tha hloh zawn mah se minute 20-naah Argentina tana goal thun hnem ber Lionel Messi chuan Lo Celso siamsak atangin hmahruaian goal a thun ta nge nge.
Messi goal thun hnu lawk hian hun tha an nei zui leh nghal zat a, minute 23-naah Nicolás González chuan hnaite atangin a tauh goal a, an goal hnihna a thun. Si hnih faia hma an hruai hnuin Messi a inlar zui leh. Messi hian minute 33-naah an goal thumna a thun a. Minute 35-naah Chelsea midfielder Enzo Fernández chuan Messi siamsak atangin an goal lina a thun belh zui leh zat a, an la duh tawk mai lo. Minute 37-naah Lionel Messi chuan Lo Celso siamsak atangin an goal nga na a thun a, hattrick a siam. Ballon d’Or vawi sarih ngawt dawng tawh Messi hian ram tan hattrick vawi sarih a siam tling ta chiah a, a uaithlak dawn lam hnaih tawhah ram tan a khel tha zual deuh deuh zel.
Chawlhlawk hmaa goal nga ngawt thun tawh Argentina hian chawlhlawk hnu lamah tan khel tha chhunzawm viau naa goal erawh an thun belh thei lawk lo thung. Goal thun belh tura an nghah deuh det hnuin minute 78-naah senior player Angel di Maria chuan an goal rukna a thun.Si ruk fai ngawtin hmahruai tawh mah se World Champion Argentina in an duh tawk mai lo. Minute 87-naah Dybala siamsak atangin World Cup final-a champion na goal thuntu Gonzalo Montiel chuan an goal sarihna a thun a, a tawp a khar ta a ni.
A pet goal theih vanga a hming lemah ‘Bati-goal’ an tih hial Grabriel Batistuta kha Argentina tana goal thun hnem ber a ni thin a. Bati-Goal record hi Lionel Messi chuan a tlanpel thui viau tawh a, La Albiceleste record khum harsa em em tuk a siam belh zel.
Footballer awm tawh zawng zawng zinga ropui ber ang hiala ngaih Lionel Messi hian Argentina tan vawi 174 a khel tawh a, goal 102 a thun tling tawh. Footballer zingah ram tana goal thun tam pathumna a ni mek a. A chungah hian goal 109 thun tawh Ali Daei leh goal 122 thun tling tawh Cristiano Ronaldo te an awm mek. Messi hian Ronaldo record a khum thei ang tih chu zawhna lian tak a ni.