Reiekah Zofest hriatrengna lung phun

Reiekah Zofest hriatrengna lung phun
Mizo Zirlai Pawl-in Zo Hnam inkhawmpui lian Zofest 2018 Reiek a neih tawh hriatrengna lungphun a siam chu Thawhlehni khan MZP Gen. Hqrs. president hlui C. Lalrokhuma’n a hawng.
MZP thuchhuak chuan, kum 2002 atang khan Zofate insuihkhawm theihna’n leh khawvel hmun hrang hranga Zofate inpawh lehzual theihna’n MZP-in Zo hnam inkawmpui lian – Zofest a buatsaih thin a. Zofest hmasa ber kum 2002-ah Churachandpur Manipur-ah neiin, Aizawl (Mizoram), Darchawi (Tripura), Haflong (Assam), Zokhawthar (Mizoram), Reiek (Mizoram) leh Sialsuk (Mizoram) ah te neih a ni tawh. Zofest hian Zofate inkarah inunauna tha tak a siam a, rah tha tak a chhuah mek zel tih MZP chuan a sawi.
‘Zofest neih tawhna hmunah Zofest hriatrengna lung phun vek nise, tia rel tawh angin, Sialsuk leh Reiekah phun a ni tawh a. Hmundang pawh phun zel tura hma lak a ni,’ thuchhuah chuan a ti.
Reieka Zofest 2018 hriatrengna lungphun hawngtu C. Lalrokhuma chuan MZP-in Zofate mamawhna zawn zelah hma a la thin a, zirna leh thu leh hla tihhmasawn a nih theihna’n ke a lo pen tawh bakah remna leh muanna awm theihna’n te, ram leh hnam tan ke pen zelin Zofate insuihkhawm theihna’n hma a la a, rah duhawm tak a chhuah tih a sawi. “Ram hmasawnna aiin kan ram leh hnam himna kan ngaihpawimawh hmasak fo loh chuan kan ram hi a ngaihtuahawm hle ang, chu chu khawvel hnamdangte ralna bul a ni,” a ti.