Ariana Grande ‘Eternal Sunshine’ a la êng ber

On Mar 26, 2024 28 0

Ariana Grande album thar ‘Eternal Sunshine’ chu Billboard 200 (albums) chart-ah a No.1 a, he chart-a kar hnih a No.1-na a ni ta, Hetihrual hian Kacey Musgraves leh Justin Timberlake te album thar pawh cart top five-ah an lang.
Billboard 200 chart hi kar khat chhunga US-a album hralh tam atanga tehin chart ranking siam thin a ni a, album hralh zat chhut nan hian album tak tak hralhna bakah streaming atanga album hralhna tlukpui leh album-a hla mal hralhna atanga album tlukpui te belhkhawm thin a ni.
‘Eternal Sunshine’ hi kar kalta khan chart No.1-aha debut, album hralh zat nen kar liamta nena khaikhinin 56%-in a tlahniam hman tawh nain, 1,00,500 hralh lehin, cung zingah 87,000 chu streaming atanga album tlukpui (on-demand official stream maktaduai 115.05) niin, album tak tak hralh zat chu 13,000 a ni a, album-a hla mal hralhna atangin 500 a tling thei bawk a, hei hi chart-ah a la No.1 pui ta tho a ni.
Kacey Musgraves album thar ‘Deeper Well’ chu 97,000 hralhin, chung zingah 66,000 chu album tak tak hralhna a ni a, Musgraves tan kar khat chhunga a album hralh that ber tum a la ni a, streaming atangin 30,000 leh hla mal hralhna atangin 1,000 a tling bawk a, chart No.2-ah a debut pui ta a ni.
Musgraves hian chart No.2 kai thei album pahnih a nei tling ta a, 2013 khan a album hmasa ber ‘Same Trailer Different Park’ chu No.2 a lo kai pui tawh a, No.2 hi a thlen san ber la niin, chart top 10 kai thei album pali a nei tling ta a ni. ‘Deeper Well’ hi 2021 hnua a album tlangzarh leh hmasak ber a ni.
Chart No.1 hlui Morgan Wallen ‘One Thing at a Time’ chu 70,000 hralh lehin No.2 atangin No.3-ah a tawlh ve thung.
Justin Timberlake album thar ‘Everything I Thought It Was’ chu 67,000 hralhin No.4-ah a debut a, tihian a album paruk chu a zawnin chart top 5-ah an debut vek a, chung zingah album pali chu No.1 an kai nghe nghe a ni. ‘Everything’ album hi physical sales chu 41,000 niin, streaming atangin 24,000 (on-demand official stream maktaduai 31.13) leh album-a hla mal hralhna atangin 2,000 a tling thei.
Noah Kahan ‘Stick Season’ cu 46,000 hralh lehin No.3 atangin No.5-ah a tawlh a, chart top 10-a lang dang zawng chu chart No.1 hlui vek niin, SZA ‘SOS’ chu 43,000 hralh lehin No.5 atangin No.6-ah a tawlh a, Taylor Swift ‘Lover’ chu 41,000 hralh lehin No.9 atangin No.7-ah a insawn thar leh a, Zach Bryan self titled album chu 40,000 hralh lehin No.6 atangin No.8-ah a tawlh a, Taylor Swift ‘1989 (Taylor’s Version)’ chu 40,000 tling lo deuh hralh lehin No.8 atangin No.9-ah a tawlh a, Ye leh Ty Dolla Sign ‘Vultures 1’ chu 39,000 hralh lehin No.4 atangin No.10-ah a tawlh ta bawk.