Ariana Grande ‘We Can’t Be Friends’ a Hot ber Ariana pi Nonna-i’n chart record a siam

On Mar 20, 2024 15 0

Ariana Grande hla thar ‘We Can’t Be Friends (Wait for Your Love)’ chu kar khat chhunga US-a hla lar ber niin, Billboard Hot 100 (singles) chart-ah a No.1 a, he chart-a a hla No.1 kai thei pakuana a ni a, a album thar ‘Eternal Sunshine’ atanga hla he chart-a No.1 thei pahnihna niin, he album atanga a lead single ‘Yes, And?’ chu chart No.1 a lo kai tawh bawk a ni. Hetihrual hian 4Batz pawh a vawi khat nan chart top 10-ah a lang ve ta bawk.
Billboard Hot 100 chart hi kar khat chhunga US-a hla lar dan tehna niin, chart ranking siam nan hian all-genre US streaming (official audio leh official video), radio airplay leh sales data te chu tehna pawimawh a ni.
‘We Can’t Be Friends (Wait for Your Love)’ hi kar khat chhungin stream maktaduai 32.6 leh sales 9,000 a tling thei a, radio airplay-ah pawh ngaithlatu maktaduai 4.6 a nei thei bawk a, hei hi chart-ah a No.1 pui ta a ni. He hla hi a original version bakah tunah chuan a ‘string version’ leh a cappella leh instrumental version te pawh a awm leh tawh.
Ariana Grande hian he chart-a No.1 kai thei hla pakua neiin, chung zinga hla pasarih chu No.1-a debut thei an ni a (No.1-a debut tih chuan chart ranking-a a lanna hmasa bera No.1 ni nghal tihna a ni mai), hmeichhe zaithiam zingah Taylor Swift lehpelin chart No.1-a debut thei hla ngah ber a ni a, mipa lamah chart No.1 a hla pakua debut thei Drake chiah a pha lo.
Ariana Grande hian hmeichhe solo artist zinga chart No.1 kai thei hla ngah lamah pawh Beyonce leh Katy Perry nih rualin pasarihna a ni ve ta a, hmeichhe zinga he chart-a No.1 kai thei hla ngah ber chu Mariah Carey niin, hla 19 a nei a (Carey hian hla 20 nei thei The Beatles chiah a pha lo), hmeichhe lamah Carey hi Rihanna (14), Madonna (12), Whitney Houston (11), Taylor Swift (11) leh Janet Jackson (10) ten an dawt.
Billboard Hot 100 chart hi kum 65-na a kal mek a, he chart-a hla No.1 kai thei hi 1,166 awm tawhin heng hlaah hian a thupuia ‘friends’ tih telna hi hla pahnih chiah a la awm a, tuna Ariana hla bakah Dionne & Friends (Elton John, Gladys Knight & Stevie Wonder) ‘That’s What Friends Are For’ tih a ni.
Teddy Swims ‘Lose Control’ chu No.2-ah bawk la awmin, Benson Boone ‘Beautiful Things’ pawh No.4 atangin No.3 a kai thar leh a, chart No.1 hlui Ye leh Ty Dolla Sign ‘Carnival’ chu No.1 atangin No.4-ah a tawlh a, Jack Harlow “Lovin on Me’ chu No.3 atangin No.5-ah a tawlh a, chart No.1 hlui Beyonce “Texas Hold ‘Em” chu No.5 atangin No.6-ah a tawlh ve ta bawk.
4Batz “Act II: Date @8” featuring Drake chuan stream maktaduai 19.9 leh sales 1,000 neiin, radio airplay-ah ngaithlatu maktaduai 84 a nei thei bawk a, chart No.61 atangin No.7-ah a invawrh a, 4Batz tan he chart top 10-a a lan vawi khatna niin, Drake tan a vawi 77-na a ni ve thung. 4Batz hi a hming tak chu Neko Bennett niin, Dallas khaw chhuak a ni.
Tate McRae “Greedy” chu No.6 atangin No.8-ah a tawlh a, chart No.1 hlui Zach Bryan ‘I Remember Everything’ featuring Kacey Musgraves chu No.7 atangin No.9-ah a tawlh a, chart No.1 hlui Ariana Grande “Yes, And?” chu No.31 atangin No.10 a kai thar ve leh ta bawk.

Tunkar Billboard Hot 100 chart-ah hian Ariana Grande hla 12 a lang thei a, chung zinga hla pakhat chu ‘Ordinary Things’ tih a ni a, he hlaah hian Ariana Grande pi, Nonna (Marjorie Grande)-i’n a tunu hi a pui a, chart No.55-ah a debut. Nonna hi kum 98 mi niin, Hot chart-a artist lang thei upa ber a ni. Ordinary Things hlaah hian Nonna hi featured artist.
A hmaa hetiang record siamtu chu Fred Stobaugh niin, kum 96 mi a nihin ‘Oh Sweet Lorraine’ tih hla hmangin chart No.42-ah September 2013 khan a lang a, he record hi Nonna hian a rawn khum ta a ni.
Ordinary Things hlaah hian Nonna hian a tawpah a pasal mual liam tawh Frank thlah nana a thurawn, “…Never go to bed without kissin’ goodnight…” a rawn chham chhuak ve a ni.
Ariana Grande hian March ni 7-a Zane Lowe nen an inkawnnaah “Ka pi Nonna tawng hi ka record fo mai, a chhanchu maw, eng nge a sawi dawn tih hi a hriat loh a. A thiannu Shirley nena an titi lai voice note minute 30 vela sei pawh ka nei,” a lo ti tawh a, a pi hian tawngkam bungrua a nei thain, eng thu thu emaw hi a chhak chhuak fo ni ngei tur a ni.