Ariana Grande ‘Yes, And?’ a Hot ber

Ariana Grande hla thar “Yes, And?” chu Billboard Hot 100 (singles) chart No.1-ah a debut a, he chart-a a hla No.1 kai thei pariatna a ni ta. Hetihrual hian 21 Savage pawhin chart top 10-ah hla pahnih a rawn nei ve bawk e.
Ariana Grande “Yes, And?” hi a studio album pasarihna, March ni 8-a a tlangzarh tur ‘Eternal Sunshine’ atanga a lead single a ni a, a hla hi ama phuah a nih bakah Max Martin leh ILYA te nen an produce ho bawk. Tihian Max Martin hi producer zngah Hot 100 chart-a No.1 kai thei hla ngah ber a ni ta a, George Martin a lehpel a, Max Martin hla produce 24 chu chart No.1 an kai tawh a ni.
Billboard Hot 100 chart hi kar khat chhunga US-a hla lar dan tehna niin, chart ranking siam nan hian all-genre US streaming (official audio leh official video), radio airplay leh sales data te chu tehna pawimawh a ni.
Ariana Grande ‘Yes, And?’ hi Hot 100 chart history, kum 65 chhunga chart No.1 ni thei hla 1,162-na a ni a, chart ranking-a a lan hmasak bera No.1 ni nghal thei hla 74-na a ni bawk.
He hla hian kar khat chhungun US-ah stream maktaduai 27.2, radio airplay maktaduai 24.8 leh sales 53,000 a tlin thei a, hei hi chart-ah a No.1 pui ta a ni. Ariana Grande hian chart No.1 kai thei hla pariat a nei tling ta a, a hla he chart-a No.1 kai thei hmasa ber chu ‘Thank U Next’ kha niin, November 2018-ah No.1 kaiin, kar sarih a No.1 thei a, a hla dang ‘7 Rings’ (Feb. 2019), ‘Stuck With U’ with Justin Bieber (May, 2020), ‘Rain on Me’ with Lady Gaga (June, 2020), ‘Positions’ (Nov. 2020) leh ‘Save Your Tears’ with The Weeknd (March 2023) te pawh chart No.1 a lo kaipui tawh a ni.
Heti hian Ariana hian Beyonce ni rualin, hmeichhe solo artist zinga he chart-a No.1 kai thei hla ngah lamah pariatna an ni a, Mariah Carey (19), Rihanna (14), Madonna (12), WHitney Houston (11), Taylor Swift (11), Janet Jackson (10) leh Katy Perry (9) te chiah a pha lo.
Chart No.1 hlui Jack Harlow ‘Lovin on Me’ chu kar thum a No.1 hnuah No.2-ah a tawlh ta a, chart No.1 hlui bawk Taylor Swift ‘Cruel Summer’ chu No.2 atangin No.3-ah a tawlh a, Tate McRae ‘Greedy’ chu No.3 atangin No.4-ah a tawlh ve ta bawk.
21 Savage hla thar ‘Redrum’ chu No.5-ah a debut a, Travis Scott leh Metro Boomin a thawhpuina ‘Nee-nah’ chu No.10-ah a debut bawk a, tihian Hot 100 chart top 10-a lang thei hla 17 a nei tling ta a, Travis Scott tan a 15-na niin, Metro Boomin tan a pangana a ni ve thung.
Chart No.1 hlui, Zach Bryan ‘I Remember Everything’ featuring Kacey Musgraves chu No.4 atangin No.6-ah a tawlh a, chart No.1 hlui bawk Doja Cat ‘Paint the Town Red’ chu No.5 atangin No.7-ah a tawlh a, Teddy Swims ‘Lose Control’ chu No.8-ah bawk la awmin, SZA ‘Snooze’ chu No.6 atangin No.9-ah a tawlh ve ta bawk.