Ariana “Yes, And?” a lar ber

Ariana Grande hla thar “Yes, And?” chu kar khat chhunga khawvel huapa hla lar ber niin, Billboard Global 200 chart-ah a No.1 a, he chart-a Ariana Grande hla No.1 kai thei pathumna a ni. He hla hi Grande album pasarihna, March ni 8-a a tlangzarh tur ‘Eternal Sunshine’ atanga a lead single a ni. Hetihrual hian 21 Savage hla pahnih bakah Kali Uchis leh Peso Pluma te hla thar te pawh chart top 10-ah an lang.
Billboard Global 200 chart hi kar khat chhunga khawvel huapa hla lar dan tehna niin, chart ranking siam nan hian ram hrang hrang 200 chuanga kar khat chhunga official-only stream (subscription leh ad-supported audio leh video music services) leh download sales te chu tehna pawimawh a ni.
Grande hla thar “Yes, And?” hi kar khat chhungin stream maktaduai 94.4 leh download sales 67,000 a tling a, hei hi Billboard 200 chart-ah a No.1 pui ta a ni. Grande hian a hla dang, The Weeknd nena an thawh dunna ‘Save Your Tears’ (May 2021) leh ‘Positions’ (November 2020)-ah te he chart-ah hian a lo No.1 pui tawh bawk a ni.
He chart-a kar hnih No.1 tawh Jack Harlow “Lovin on Me” chu No.2-ah a tawlh a, chart No.1 hlui Tate McRae “Greedy” chu No.2 atangin No.3-ah a tawlh a, Xavi “La Diabla” chu No.3 atangin No.4-ah a tawlh ta bawk.
21 Savage hla thar ‘Redrum” chu stream maktaduai 44.7 leh sales 1,000 tlingin No.5-ah a debut a, 21 Savage hla dang, Travis Scott leh Metro Boomin te a thawhpuina ‘Nee-nah’ chu stream maktaduai 33.8 leh sales 1,000 tlingin chart No.8-ah a debut bawk. 21 Savage hian he chart top 10-a lang thei hla 16 a nei tling ta a, Travis Scott tan a pakuana niin, Metro Boomin tan a pangana a ni ve thung.
Kali Uchis leh Peso Pluma hla thar ‘Ugual Que Un Angel’ chu stream maktaduai 32.2 leh sales 1,000 tlingin No.9-ah a debut a, Kali Uchis tan he chart top 10-a a hla lang thei pahnihna niin, Peso Pluma tan a 10-na a ni ve thung.