Arsenal an chak nghal

September 16, Thawhlehnia zan khan UEFA Champions League 2025-26 khelh tan a ni a, English club lian Arsenal in hnehna an chang nghal. Arsenal chak rual hian Union Saint-Gilloise pawhin UCL an khelh hmasak berah hnehna an chang ve bawk.
Arsenal hi Spanish club Athletic Club hmachhawn turin San Mamés Stadium-ah an lenglut. An len luhna mualah an khel tha a, an tlarhnung a phui tha leh viau bawk. Mualneitu Athletic Club hian an goal venhim tumin tan an khawh nasa viau a. Him tluan teuh viau mah se bench atanga lut Martinelli leh Trossard te an dang zo ta lo thung.
Inkhel hmuhnawm takah goal lut a awm theih loh reng hnuin Gunners manager Mikel Arteta chuan fing takin player a thlak a, Grabriel Martinelli leh Leandro Trossard te a luh tir. Mual chhung a luh atanga rei loteah Martinelli chuan Trossard siamsak atangin goal a thun a, minute 72-naah Arsenal hmahruaina goal a thun.
Inveng nasa tak Athletic Club lakah goal an thun hnuin Arsenal an khel tha leh zual a, goal pawh an thun belh leh ta bawk. Hun tawp dawn hnaih minute 87-naah Leandro Trossard chuan Martinelli siamsak atangin an goal hnihna a thun a, an hmahruaina a tizau. Bench atanga lut Martinelli leh Trossard ten goal khat ve ve an thun a, assist an nei ve ve bawk. Bench atanga lutte an chetha em em mai hi Arsenal squad chhahzia tilang chiangtu a ni a. An squad a chhah tak em vangin Gunners hian trophy an chawi rinna lian tak a awm zui ta bawk.
Arsenal hian Spanish club an ngam viau a, Spanish club an hmachhawn hnuhnung parukte an hneh vek. Heng zingah hian club ropui Real Madrid ngei pawh an tel a. Gunners hi Champions League / European Cup-ah a zawna Spanish club paruk hneh zawn thei hmasa ber an ni ta hial bawk.
Thawhleh zana inkhel dangah Union Saint-Gilloise chu a vawi khat nan UCL-ah an inlan. UCL an hmachhawn hmasak berah Mimualah inlan bawk mah se 3-1 ngawtin mualneitu PSV Eindhoven an hneh a, beisei phak baka thain bul an tan. Union Saint-Gilloise tan hian Promise Akinpelu, Anouar Ait El Hadj leh Kevin Mac Allister ten goal an thun.
Thawhleh zana inkhel dangah Real Madrid in Mbappe goal hnih thun hmangin an khingpui Marseille an hneh ve bawk.