February 10, Inrinni zan khan English Premier League 2022-23 khelh chhunzawm a ni a. Hmahruai fal tura chak mamawh Arsenal chuan an mikhal Brentford an hneh zo lova, uiawm takin point hnih an hloh. Inrinni zan kha London club lian tak zan tha lo tak mai a ni a, Chelsea an chak zawh bakah Tottenham chu Leicester City lakah an tlawm chiang viau bawk.
-- Advertisement --
EPL season kal meka hmahruaitu Arsenal hian Emirates Stadium-ah pasarihnaa awm mek Brenford an mikhual a, an hnuai chiaha awm Manchester City nen an inkar tizau turin an mualah chak an mamawh. Everton laka tlawm hlimhlawl an nih vangin Gunners hian Brentford lakah chak an mamawhna a sang leh zual. An player thar Leandro Trossard hmangin hmahruai bawk mah se an vanduai a kaltluang a, an mualah an chak zo ta chuang lo.
Arsenal le Brentford te hi an innawr tawk viau a, goal pawh an thun har dun hle. Minute 66-naah Leandro Trossard chuan Bakuyo Saka siamsak atangin Arsenal hmahruaina goal a thun. Trossard goal thun hi humhim a, point thum hmuh ngei an tum laiin goal an chhuah ta thuai thung. Minute 74-naah Ivan Toney chuan Christian Nørgaard siamsak tauh goal in an si phurh a sut. Brentford goal thun danah Arsenal hian offside awm ngei niin an hria a, an lungawi lo hle. Offside an awm leh awm loh hi VAR hmanga endik ngial a nih hnuin pawmsak an ni. An goal thun dan pawmsak ni bawk mahse Brentford player zingah offside an awm ngeia a lan tlat bawk si vangin inhnialna a tam zui hle.
Brentford in an si phurh an sut hnuin Arsenal hian goal thun tumin thapui thawh chiam thin mah se an hlawhtling zo lova, an mualah hnehna an chang zo lo. Brentford lakah chak zo lova, point hnih an hloh leh tak vangin Arsenal hmahruaina a derthawng a. Pathianni zanah Manchester City in Aston Villa an hneh a nih chuan an inkarah point thum chauh a tlazep tawh dawn. Arsenal leh City te hi vawi hnih an la intum zui dawn bawk a, champion tur zawk rin thiam a har rih hle.
Inrinni zana inkhel dangah thlasik bazar laia sum seng hnem filawr Chelsea an chak zo bik lo. Chelsea hian London Stadium-ah West Ham hmachhawnin London derby an khel. Chelsea tan hian minute 16-na lekah an player thar Joa Felix chuan hmahruaina goal a thun. Hma takah goal an thun vangin phur viau mah se an phur rei lo hle thung. Minute 28-naah Emerson chuan goal thuninWest Ham si phurh a sut. Darkar chanve hmaa goal hnih lut bak hi goal dang a luh belh thei tawh lova, thlasik bazara sum seng hnem Chelsea chu a zawnin an khingpuite nen an inhnehtawk a, beisei angin hma an sawn thei lo.
London club lian pahnih; Arsenal leh Chelsea te an inkhingpuite nen an inhnehtawk laiin London Hmar veng club lian Totttenham Hotspurs chu Leicester City lakah chiang taka tlawmin, an mualpho ve thung.
King Power Stadium a lenglut Tottenham hian bul an tan tha a, minute 14-na lekah Rodrigo Bentancur chuan hmahruaina goal a thun nghal. Hma takah goal thun mah se an nawi zui ta tlat a. Leicester City tan Nampalys Mendy, James Maddison, Kelechi Iheanacho ten chawlhlawk hmain goal an thun a, 3-1 ngawtin an mikhualte an lehthal hman. Chawlhlawk hnu lamah Foxtes tan Harvey Barnes chuan goal a thun belh leh cheu bawk.