Pathianni zing khan Australia khawpui pakhat Perth ah hlawh-tling takin UFC 284 neih a ni a, Lightweight champion Islam Ma-khachev chuan Alex-ander Volkanovski hnehin a kawnghren a humhim.
-- Advertisement --
UFC 284-ah lightweight champion Islam Makhachev leh featherweight champion Alexander Volkanovski te inhmachhawn tur hian ngaihven a hlawh viau a. UFC pound for pound no 1 ni mek Volkanovski hi chak tura rinkai zawk niin, weight then hran pahnihah champion kawp ngei tura ngaih a ni. An ram khawpuia fight hmachhawn a nih vangin kum 34 mi Volkanovski hian tan a hlawh hle nghe nghe. Fight ngaihven hlawh takah fighter pahnihte an inngam tawk viau a, an inbei a hmuhnawm viau bawk.
Fight hmuhnawm takah hian round nga chhungin lightweight champion Makhachev a che tha zawk a, endiktu pathum ten chak zawkah Russian fighter hi an puan vek. Khingpui hautak lakah unanimous decision a hnehna changin Islam Makhachev hian a kawnghren a humhim bakah Volkanovski nek chhuakin UFC pound for pound no. 1 thar a ni dawn bawk. Pathian ni zinga a hneh tak Volkanovski kha vawi 12 chak zawn tawh niin a chak tluang lai a titawp a. Volkanovski chak tluang lai a tihtawp laiin Makha-chev hi vawi 12 a chak zawn ve ta chiah thung a, hei hi UFC-a a chak zawn rei ber tum a ni.
UFC 284 a fight ngaihven hlawh dangah Yair Rodriguez chuan a khingpui Josh Emmett chu round hnihna lekah submission hmangin a hneh a, UFC ah a vawi khat nan submission hmanga a chakna hmang hian featherweight champion lai lawk a ni. Rodriguez hian Makhachev laka tlawm Volkanovski a hmachhawn zui ngei tura ngaih a ni.