Arsenal hmaah Haaland chiang lo
Pathianni Premier League match pakhata 3-1-a Aston Villa an hneh tuma half time laia an thlak Manchester City striker Erling Haaland chuan naktuk zan league match pawi-mawha hmahruaitu Arsenal an luhkhung hunah khelmual a lut thei dawn em tih he thu buatsaih lai thlengin a la chiang lo!
Premier League top-of-the table match an tih maiah hian season kal laia City tana goal 25 thun tling tawh Haaland hi an chhawr thei lo a nih chuan Etihad club tan hlohna lian a tlin ngei hmel a, lo risk ta pawh ni se 100% fit lo chung chuan team tan a thawhhlawk thei lo mai thei a, City fans tan an star forward dinhmun hi thin tiphu dup dup thei a nih ngei hmel!
City boss Pep Guardiola chuan a striker chungchang sawiin, “Inhliam han tih em tur ni lo mah se a insawh sil deuh a, nuam lo tihna a nei a, half-time laiin kan team doctor-te ka bia a, sithum faia hmahruai lai kan nih bawk avangin risk laa khelh chhun-zawmtir an tichiah lo a, kei pawhin ka pawmpui a, score kha khati lo deuh chu ni se ka khelhtir tho mai thei.
“Hliam han tih tur pui pui ni lo mah se Thawhtanni lamah a dinhmun kan hrechiang ang a, Nilainia chhawr theih chu han beisei chhin phawt ila, a la inpeihchhuak chiah lo emaw risk ngai ang chi a nih chuan kan luhtir lui talh lo ang,” a ti.
Naktuk zan Emi-rates Stadium inkhela an chak chuan goal difference hmanga Arsenal leh-pelin City-in league table-ah hma an hruai thei dawn a; chutih laiin Inrinnia an mikhual Brentford laka point khat hloh then Gunners hian Manchester City aiin game khatin an khel tlem zawk rih thung.
League hmahruaitu Gunners hian khelh 21-ah point 51 hum mekin, Etihad club hian match 22-a point 48 nei chungin pa-hnihna an luah.