Villareal muala 1-0 hnehna changin Barcelona chuan Spanish La Liga table-a an hmahruaina an sawhnghet leh sauh a, mahse, Fifa Club World Cup final an khelh avanga match khata khel tlem Real Madrid-in February ni 15-a an mikhual tur Elche an hneh ve leh chuan Barca nena an inkar an pawtzim leh hlek thei ang.
-- Advertisement --
Tun dinhmunah Catalan team hian league khelh 21-ah point 56 khawl tling tawhin, Real hian game 20-ah point 45 an nei thung.
Pathianni khan Xavi Hernandez-a team hian Estadio de la Ceramica-ah Villarreal luhkhungin, first-half minute 18 a kal mek laia Pedri goal khat tihluh hmangin point thum an thawkchhuak a; an hnuai chiaha pahnihna luahtu Real Madrid nena an inkar chu point 11 zeta tizau tawhin, kum 2019 hnu lama an league title hmasaber tur an hnaih deuh deuh.
Robert Lewandowski chuan Villareal lakah goal thun theihna hun tha hmu bawk mah se lehlam goalkeeper Pepe Reina zawnah tak a chhuih a, mahse, a thawhrah hmangin kum 20 mi Pedri chuan goal awmchhun leh mikhual chakna goal ni zui ta a thun a; a hnu lawkah pawh Polish international hian goal a thun thuak a, mahse, Reina bawkin a dansak leh.
He inkhelah hian Villareal vanduaina belhchhah turin minute 35-ah midfielder Francis Coquelin chu khup hliamin a tibuai a; inkhel boruak sang takah referee Alejandro Hernandez Hernandez chuan minute 90 chhungin yellow card pariat a phawrh hman a, team pahnihin pali ve vein an insem!
An kawtkaia point thawkchhuak zo lo Villareal hian point 31 hum chungin table-ah pariatna an luah a, point sarih ngawtin season thara La Liga atanga Champions League khelh phakna hmun hniam ber an luah pha lo a, he hmun hi Atletico Madrid-in point 38 nen an thut mek.