Tun season-a inlan tawh lo tur Bentancur

Tottenham midfielder Rodrigo Bentancur chuan Leicester City an tum tuma a khup a tihnat avangin tun season-ah north Londoners tan a inlan tawh dawn lo.

Karliamta Inrinni Premier League inkhel pakhatah Spurs hi 1-4-in Leicester chuan an sawp a, he inkhela Tottenham goal awmchhun khungtu Bentancur hi khup hliam avangin second half minute 65-ah lakchhuah niin, a hliam endik a nih hnuah kum 25 mi hi tun season la bang zawng atana a chawlh tur thu nemngheh a ni.

Spurs thuchhuah chuan Bentancur-a khup veilam hliam chu footballer-te natna chimawm (ruptured the anterior cruciate ligament) a nih thu an puang a, zai a ngaih tur thu an tarlang tel.
He Uruguay international hian Foxes lakah goal khungin a team chu hma a hruaipui zet a, Nampalys Mendy nen an insutna lamah hliam a tuar a, khelmual chhungah oxygen pek a ngai hial a, khelmual chhunga hlang (stretcher) kenluh ni mah se amahin a baichhuak ta zawk a ni.

Ram tana 2022 World Cup khel Bentancur hian tun season-ah Tottenham tan game 26 khelin goal ruk a thun a, assist vawihnih a siamchhuak hman.
Zanin Champions League last 16 first leg-a Spurs leh AC Milan inkhelh hunah a tel thei dawn ta lo a ni.